Qazaqstan qalalarynda úı ınternetiniń quny qansha
ASTANA. KAZINFORM – Qazir qalalardyń kóbinde ınternet qyzmetin jalpyrespýblıkalyq provaıderler usynyp otyr. Al keıbir óńirde aımaqtyq kompanııalar jumys istep tur, dep habarlaıdy Kazinform agenttiginiń tilshisi.
Tarıf baǵasy qansha jáne oǵan ne kiredi?
Qazaqstan qalalarynda kóbine iri kompanııalardyń jumysy oń jolǵa qoıylǵan. Tarıfke tek ınternet qyzmeti ǵana emes, telearnalar, onlaın-kınoteatr men baılanys kiredi. Baılanys operatorlary óz arasynda sóılesse, aqy almaıdy, al ózgesine shekteýli mınýt esepteıdi. Sonymen birge mobıldi ınternet gıgabaıtqa baılaýly.
Al úı ınternetinde munyń bári birdeı bola bermeıdi. Degenmen elimizdiń keıbir qalasynda arnaıy qyzmeti men tarıfi bar provaıderlerdi keziktiremiz. Sonymen birge qazir baılanys úshin ǵana emes, roýterdi jalǵa alǵany úshin de aqy tóleıdi. Bul talap bárine ortaq.
Qazaqstan qalalarynda úı ınternetiniń baǵasyna baspananyń qaıda ornalasqany jáne kópqabatty nemese jer úı ekeni mańyzdy. Jer úıge qaraǵanda kópqabatty úılerdiń tarıf baǵasy tómen.
«Eń qymbat» ınternet
«Beeline» kompanııasy usynǵan ınternet qyzmetiniń baǵasy joǵary. Munda jyldamdyǵy 300 mb/s bolatyn tarıf quny – 17 999 teńge. Oǵan 5 baılanys nómirin, baılanys operatory arasynda tegin sóılesý múmkindigin usynady. Sonymen birge telearnalardy qosady, onlaın kıno qaraýǵa bolady.
Tele2 operatory da alysqa uzap ketpedi. Bul kompanııada eń qymbat tarıf - 17 490 teńge. Jyldamdyǵy - 1000 mb/s. Munda 6 baılanys nómiri, sonymen birge lımıtsiz ınternet bar. Óz arasynda tegin sóılese alady.
Odan ári Qazaqtelekom kompanııasy tur. Munda jyldamdyǵy 500 mb/s bolatyn úıdegi ınternetke aı saıyn 16 999 tóleýge týra keledi. Oǵan 170 telearnany, 4 sım-kartany qosa beredi. Baılanys osy operator arasynda tegin, ózgelerine 1000 mınýt bólingen. Sonymen birge 60 gıgabaıt qosa esepteledi.
Bul kompanııalardyń bári Qazaqstan qalalarynda qoljetimdi.
Qazaqstan óńirlerinde ınternet baǵasy qansha?
Úı ınterneti elimiz boıynsha Qaraǵandyda arzan bolyp shyqty. «Optinet» kompanııasy jyldamdyǵy 100 mb/s bolatyn qyzmetti 3 000 teńge dep baǵalap otyr. Munda 165 telearnany qaraýǵa bolady. Al roýter úshin aı saıyn 500 teńge tóleıdi.
Ekibastuz qalasynda da tarıf baǵasy osy shamalas. «DV-Line» kompanııasynyń qyzmeti kópqabatty úılerde 3 900 teńge. Jyldamdyǵy - 20 mb/s deıin. Al jeke sektorda baǵa 5 900 teńge. Internet jyldamdyǵy - 50 mb/s deıin.
Atyraý qalasynda «Fibernet» kompanııasy jyldamdyǵy 100 mb/s bolatyn úıdegi ınternetke aı saıyn 3 990 teńgelik tarıfti bekitken. Jeke úılerdiń ıesi jyldamdyǵy 30 mb/s bolatyn tarıf úshin aı saıyn 5 900 teńge tóleıdi.
Qostanaıda úıdegi ınternet baǵasy – 4 000 teńge. Kabeldi jeliniń jylamdyǵy - 100 mb/s. Al Taldyqorǵanda dál osyndaı jyldamdyqtaǵy ınternet baǵasy – 4 400 teńge. «Kainar.NET» kompanııasy jer úılerde qyzmet kórsetkende tarıfke taǵy 500 teńge qosady.
Oral qalasynda úı ınternetiniń baǵasy 5 myń teńgege jýyqtap qaldy. Munda «SAS Telecom» kompanııasy 4 900 teńge bolatyn ınternet qyzmetin kez kelgen shaǵyn aýdanǵa jetkizip bere almaıdy. Bul qyzmet «Zachaganskıı» baý-baqsha ujymyna, «Balaýsa» turǵyn alaby men Saryarqa, Sarytaý, Arman, Aqjaıyq, Komıntern, Ǵalymdar aýyly, Jaqsy aýyl, Qazaq aýyl, Qus farrıkasy shaǵyn aýdandary men Podstepnoe, Jympıty, Túkpaı, Dostyq aýyldarynda ǵana bar.
Óskemen men Almatyda baǵa 4 990 teńgeden bastalady. Munda «Fastline» jáne «Meganet» kompanııasy bar. Óskemende ınternet jyldamdyǵy 50 mb/s bolsa, ońtústik astanada - 200 mb/s.
Qazaqstannyń birneshe qalasynda «Transtelekom» kompanııasynyń qyzmeti arzan bolyp shyqty. Petropavl, Pavlodar, Kókshetaý, Aqtóbe, Aqtaý, Túrkistan, Shymkent, Semeı men Astanada jyldamdyǵy 100 mb/s bolatyn ınternettiń baǵasy aıyna 4 999 teńge.
Odan ári Taraz qalasy tur. Munda «Alma+» kompanııasynyń qyzmeti - 5 490 teńge. Internet jyldamdyǵy – 300 mb/s.
Qyzylorda qalasynda úıdegi ınternet tarıfiniń quny ózge óńirlerge qaraǵanda joǵary bolyp shyqty. Tele2 kompanııasy jyldamdyǵy 1000 mb/s bolatyn ınternetke aı saıyn 7 490 teńge eseptep beredi. Jezqazǵandaǵy tarıf baǵasy aıyna – 7 499 teńge. Munda «Beeline» kompanııasy usynatyn ınternettiń jyldamdyǵy – 300 mb/s.
Buǵan deıin Qazaqstandaǵy qoǵamdyq kólikterdiń jolaqysy týraly jazyldy.
Sonymen birge TQS pen UBT kýrstary qyzmeti týraly bildik.