Qazaqstan qalalarynda taksı qyzmetiniń quny qansha
ASTANA. KAZINFORM — Jyl ishinde taksı qyzmetiniń quny kóp ózgere qoımady. Keıbir qalada baǵa burynǵy qalpynda qalǵan.
Taksı qyzmetiniń baǵasyna birneshe faktor áser etedi. Olar: aýa raıy, suranys, adamnyń mekenjaıy. Jaýyn-shashyndy kúni suranys artyp, sáıkesinshe baǵa da kóteriledi. Sonymen birge adamdar jumysqa baratyn, úıine qaıtatyn shaqta dál osyndaı jaǵdaı bolady.
Reıtıng jasaǵan kezde ıAndeks Go kompanııasynyń «Ekonom» tarıfin nazarǵa aldyq. Bul elimizdiń barlyq derlik qalasynda bar qyzmet túri. Bir shaqyrymǵa qansha teńge esepteletinin bilip, salystyrdyq.
Baǵaǵa kútý ýaqyty, úı janýarlaryn tasymaldaý qyzmeti, balalarǵa arnalǵan kreslonyń bar-joǵy da áser etedi. Al mundaı qyzmet ázirge tek birneshe qalada ǵana kezdesedi.
2024 jylmen salystyrǵanda bıyl taksı qyzmetiniń quny az ǵana kóterildi. Kópshiliginde baǵa sol kúıi ózgerissiz qalǵan. Byltyrǵydaı eń arzan tarıf Taraz qalasynda bolyp tur. Munda alǵashqy shaqyrymy 220 teńge bolsa, ári qaraı 60 teńgeden qosylady.
Odan keıingi orynda Ekibastuz, Qyzylorda men Túrkistan qalalary tur. Munda alǵashqy bir shaqyrymy — 240 teńge. Al keıingi shaqyrymdaryna 65, 60 jáne 55 teńge esepteledi.
Aqtóbe qalasynda da baǵa sol kúıi saqtalǵan. Munda alǵashqy shaqymyna 270 teńge, ári qaraı 60 teńge esepteledi. Qostanaı, Petropavl men Aqtaýda taksı qyzmetiniń shaqyrymy 280 teńgeden bastalady. Ári qaraı Petropavlda ózge ekeýine qaraǵanda tarıf qymbat. Sebebi ár shaqyrymyna 70 teńge qosylady.
Taldyqorǵanda taksı qyzmetiniń alǵashqy shaqyrymyna 285 teńge esepteledi. Bir jyl buryn munda 280 teńge boldy. Qazirgi kezde keıingi shaqyrymdaryna 64 teńgeden qosylady.
Tarıfi tómen qalalar tizimin Pavlodar túıindep tur. Munda alǵashqy shaqyrymy 290 teńge bolsa, keıingisine 64 teńgeden qosylady. Byltyr dál osy baǵa Shymkent qalasynda da tirkeldi.
Oral men Semeıdegi tarıf — 300 teńge. Ári qaraı birinde 64, ekinshisinde 65 teńgeden qosylady. Bul eki qalada da tarıf ózgerissiz qaldy.
Shymkent qalasynda tarıf ósti. 2024 jyly alǵashqy shaqyrymy 290 teńge bolsa, qazir eń kem degende 310 teńge suraıdy. Keıin ár shaqyrymyna 60 teńge esepteıdi.
Atyraý men Qaraǵandyda taksı shaqyrý qyzmetiniń tarıfi 320 teńge. Byltyr da dál osy baǵa tirkeldi. Shahterler qalasynda keıingi shaqyrymy 70 teńge bolsa, munaıshylar qalasynda 57 teńge esepteledi.
Jezqazǵan qalasynda baǵa joǵary bolyp tur. Alǵashqy shaqyrym munda 370 teńge, keıin 50 teńge. Al Kókshetaýda 350 teńgeden bastalyp, ár shaqyrymyna 58 teńge qosylady.
Dál osy qatarǵa Óskemen qalasy da jaıǵasty. Munda birinshi shaqyrymyna 370 teńge, keıin ár shaqyrymyna 73 teńge esepteledi. Bul Qazaqstan boıynsha eń joǵary tarıf.
Birinshi orynda — Almaty men Astana qalalary. Munda byltyrǵa qaraǵanda bıyl tarıf 20 teńgege ósti. Alqashqy shaqyrymyna 420 teńge eseptelip, keıin ár shaqyrymyna 65 teńge qosylady.
Aıta keteıik, buǵan deıin monsha men SPA ortalyqtarynyń qyzmeti týraly jazǵan edik.