Qazaqstan qalalarynda shybyn-shirkeıden qorǵaıtyn tor men qorǵanysh temirin ornatý quny qansha
Kún jylyna tereze ashyp, balalarǵa qaýip tónýi múmkin. Ári shybyn-shirkeı de kóbeıedi. Munyń aldyn alý úshin elimizde qaýipsizdik tory men qorǵanysh ornatý qyzmeti usynylady, dep habarlaıdy Kazinform agenttiginiń tilshisi.
Kóktem týǵanda adamdar tereze ashyp qoıady. Alaıda taza aýamen tynystaý keıde jas ata-analardy qaıǵyǵa dýshar etýi múmkin. TJM sáýir aıynyń alǵashqy kúnderinen bastap balalardy qaraýsyz qaldyrmaýdy, áp sátte olardyń terezeden qulap ketýi múmkin ekenin aıtyp, jıi eskertý jasady.
Balalardyń boıynda qorqynysh sezimi bolmaıdy ári olar bárin qyzyq kóredi. Kishkentaılar úshin dalada ne bolyp jatqany qyzyq. Kólikterdiń qozǵalysyn qarap, aǵashtardyń butaǵyna qol sozady. Mundaıda olar ózderin joǵary qabatta turǵanyn, alǵa umtylý qaýipti ekenin bilmeıdi. Birer sekýnd kózden tasa bolsa, orny tolmas ókinishke ákep soǵýy múmkin. Al eresekter shybyn-shirkeıden qorǵaıtyn tordyń kómegi bolady dep oılaıdy. Alaıda bul qate túsinik.
Masadan qorǵaıtyn tor tek shybyn-shirkeıden qorǵaıdy. Al bala salmaǵyn kótere almaıdy. Tipti bala ustap, tirep turmyn dep oılap, bar salmaǵymen alǵa umtylady. Qaıǵyly jaǵdaıdy bastan ótkermes úshin arnaıy tor qoıýdy usynady. Bul bala salmaǵyn kóteretin tor.
Shybyn-shirkeıden qorǵaıtyn tordan bastaıyq. Qazaqstanda mundaı tordyń ortasha baǵasy – 5 000 teńge. Alaıda keıbir óńirde odan arzan, keıbirinde qymbat.
Eń arzany Almaty qalasynan tabyldy. Іri megapolıste baǵa 2 500 teńgeden bastalady. Oral qalasynda 3 000 teńge, al Qonaev qalasynda 3 200 teńge, Shymentte 3 500 teńge jáne odan joǵary. Qyzylorda men Qaraǵandy qalalarynda masadan qorǵaıtyn tor baǵasy 4 000 – 4 500 teńge bolyp tur.
Al kóp qalada baǵa 5 000 teńge. Olardyń qatarynda Astana, Túrkistan, Semeı, Petropavl, Taraz, Pavlodar, Jezqazǵan, Qostanaı, Aqtóbe qalalary bar. Shybyn-shyrkeıden qorǵaıtyn tor ornatý Taldyqorǵan, Atyraý, Kókshetaý qalalarynda sál qymbat. Munda baǵa 6 000 teńgeden bastalady.
Baǵa Óskemen men Aqtaý qalalarynda joǵary. Tordyń baǵasy 7 000 teńden bastalady. Bul tordyń eń arzan túri. Sonymen birge qazir shań-tozańnan qorǵaıtyn (shańǵa qarsy tor 14 000 – 20 000 teńge) jáne úı janýarlarynyń qashyp ketýinen saqtaıtyn (mysyqty qorǵaıtyn 9 500 – 30 000 teńge) tor da ornatylady. Sonymen birge baǵa terezeniń kólemine, jaqtaýynyń neden jasalǵanyna, qurylymyna, materıaldyń qaıdan shyǵarylǵanyna (Túrkııa nemese Reseı) baılanysty ózgerip otyrady. Keıbiri páterdiń sharshy metrin esepteıdi. Syrǵymaly tor jasap beretin kompanııalar da bar.
Qazaqstan boıynsha balalardy qorǵaýǵa arnalǵan tor baǵasy orta eseppen – 10 – 15 myń teńge. Bul joly da eń arzany Almaty qalasynda bolyp shyqty. Munda baǵa Óskemen, Qonaev pen Semeıge qaraǵanda eki ese arzan. Al bul qalalarda 8 000 teńgeden bastalady. Qyzylorda qalasynda baǵa 9 000 teńge jáne odan joǵary.
Elimizdegi ortasha baǵa – 10 000 teńge. Astana, Túrkistan, Taraz, Aqtaý, Jezqazǵan men Qaraǵandyda baǵa osyndaı. Aqtóbede 12 500 teńden, Shymkent pen Qostanaıda 14 000 teńgeden bastalady. Taldyqorǵan, Atyraý, Kókshetaý, Pavlodar men Oralda odan sál joǵary, ıaǵnı, 15 000 teńge.
Qazaqstan boıynsha eń qymbaty Petropavl qalasynda jasalady. Bul qalada baǵa 20 000 teńgeden bastalady. Jalpy elimiz boıynsha temir tor ornatý qyzmetiniń quny 30 000 teńgege deıin jetedi.
Eger qandaı da bir erekshe dızaındy tańdasańyz, ústine 5 000 teńgege qosýǵa týra keledi. Sonymen birge óndirýshiler masadan qorǵaıtyn tor men temir ornatý qyzmetin qatar usynady. Bul kezde baǵa 12 000 – 16 500 teńge aralyǵynda bolady. VIP-júıe bolsa, keıde 100 000 teńgege jetedi.
Eger tapsyrys berse, ólsheý jáne ornatý tegin bolady. Keıbir kásipkerler ol qyzmetke de qosymsha aqy alady. Ólsheý qyzmetiniń baǵasy shamamen 3 000 teńge bolsa, bir tordy ornatý 1 500 – 3 600 teńgege jetedi. Eski temirdi alý qyzmeti 5 000 teńge jáne odan joǵary.
Keıbiri terezege temir ornatpaıdy, esesine qulyptap qoıýǵa bolatyn múmkindikti paıdalanady. Bala óz erkimen terezeni tolyq asha almaıdy. Іlmektiń de birneshe múmkindigi qarastyrylǵan. Ornatý ońaı ári baǵasy arzan. Máselen Petropavlda 1 800 teńge bolsa, Qaraǵandy qalasynda 500 teńden bastalady. Shymkentte baǵa 2 500 teńge, al Astana men Kókshetaý qalalarynan 5 000 teńgege tabýǵa bolady. Shymkentte áleýmettik jaǵynan az qamtylǵan jáne kópbalaly otbasyna ilek tegin ornatylady.
Kez kelgen qazaqstandyq terezeni tolyq ashýǵa múmkindik bermeıtin ilmekti 1 000 – 5 000 teńgeden taba alady. Balanyń ómirinen eshteńe de qymbat emes.
Buǵan deıin Qazaqstandaǵy kilem jýý qyzmeti týraly jazyldy.
