Qazaqstan qalalarynda mandarın baǵasy qanshadan
Kazinform agenttiginiń tilshisi Jańa jyl meıramy qarsańynda mandarın baǵasy qansha ekenin bildi.
Birer aptadan soń Jańa jyl meıramy toılanady. Demek mandarınge suranys artady. Qazir dúken men sýpermarket sóreleri tsıtrýs ónimderine toly. Bári de ózge elden ákelingen. Baǵa da soǵan saı ózgerip tur.
Qazir elimizge mandarın Túrkııa, Ózbekstan, Pákistan, Iran, Qytaı men Marokkodan tasymaldanady. Satýshylardyń aıtýynsha, olardyń ishinde Qytaı men Túrkııa eliniń ónimderine suranys artqan. Ózbekstan tsıtrýsynyń hosh ıisi bar, al marokkalyq ónim baǵasy joǵary.
Mandarın baǵasyna birneshe faktor áser etedi. Óndirýshi eldegi ónim shyǵyny, logıstıka men valıýta baǵamy, maýsymdyq suranys (Jańa jylǵa qaraı baǵa kóteriledi) jáne surpyna qaraı baǵa ózgeredi. Dámi tátti jáne qabyǵy juqa tsıtrýs ádette qymbat.
Mandarın – S dárimenine baı. Qysta ımmýnıtetti nyǵaıtady. Sonymen birge jemis as qorytýdy jaqsartady, adam boıyndaǵy suıyqtyqty qalpyna keltiredi, al efır maıy adamdy sergitedi.
Baǵany salystyrǵan kezde Túrkııa jáne Qytaıda ósirilgen mandarındi mysalǵa aldyq.
Tarazda túrik tsıtrýsynyń baǵasy arzan. Munda kelisi – 700 teńge. Al Qaraǵandyda – 900 teńge. Sonymen birge Petropavl, Jezqazǵan men Astanada (1 000 teńgeden bastalady) baǵa tómen. Al Shymkentte Túrkııadan jetkizilgen mandarın baǵasy sál joǵary. Kelisi 1 100 teńgeden bastalady. Al Aqtóbede 1 150 teńgeden salyp alýǵa bolady.
Pavlodar, Kókshetaý men Oralda mandarınniń ortasha baǵasy – 1 300 teńge. Almaty, Taldyqorǵan, Qyzylorda men Túrkistanda túrik tsıtrýsynyń kelisi – 1 500, al Qostanaıda – 1 600 teńge. Túrkııadan ákelingen mandarınniń eń qymbaty Semeı men Óskemende satylady. Munda kelisi – 1 800 teńge.
Qytaıdan tasymaldanǵan mandarın baǵasy odan sál tómen. Eń arzany Qyzylorda qalasynan tabyldy. Munda kelisi – 700 teńge. Al Túrkistan men Shymkentte baǵa 800 teńgeden bastalady. Qytaılyq mandarın baǵasy Petropavlda – 900, al Almatyda 999 teńgeden bastalady.
Qazirgi kezde Qytaıdan tasymaldanǵan mandarın baǵasy kóp qalada 1 000 – 1 200 teńge bolyp tur. Mundaı baǵadaǵy tsıtrýsty Qaraǵandy, Qostanaı, Astana, Taraz, Kókshetaý, Taldyqorǵan, Jezqazǵannan tabýǵa bolady. Al Semeı men Óskemende mandarın baǵasy kelisine – 1 300, Aqtóbede 1 400 teńgeden bastalady. Elimiz boıynsha eń qymbat mandarın Oral (1 694 tg bastalady) jáne Pavlodar (1 700 tg bastalady) qalalarynda satylady.
Aıta keteıik, buǵan deıin elimizdegi soǵym baǵasyn bildik.