Qazaqstan qalalarynda qurma baǵasy qansha turady
Qurma — Ramazan aıynda suranysqa ıe jemis. Kazinform agenttigi qalalardyń bazarlary men dúkenderinde baǵasy qansha turatynyn anyqtap bildi.
Qazaqstanda qurmanyń surpy, sapasy men satý ornyna qaraı baǵa ártúrli. Salmaǵy 500-600 gr bolatyn qurma baǵasy orta eseppen 600-1300 teńge turady. Al eksklıýzıv surpynyń kelisi 3000 teńgeden bastalady.
Qaraǵandy men Jezqazǵanda ırandyq qurmanyń 500 gramyn 400-800 teńgege satyp alýǵa bolady. Patshalar surpynyń kelisi 5000 teńgeden bastalady.
Al Túrkistanda 500 gr bolatyn qurma baǵasy 600-650 teńge turady. Kelisin 1000-1200 teńgege satyp jatyr. Almatyda 500 gr bolatyn qurma quny 620 teńgeden bastalyp, 800 teńgege deıin jetedi. Al salmaǵy 600 gramdyq qurma 650 teńge turady. Aljırlik qurma (200 gramm) baǵasy 730 teńge dep kórsetilgen.
Kókshetaýda 500 gr bolatyn qurmanyń qoraby 660 teńge, 600 gr qurma baǵasy 929-1209 teńge bolyp tur. Shymkentte 500 gr bolatyn qurma quny — 650-1300 teńge. Al Qonaev qalasynda 500 gramdyq qurma 670-1200 teńge turady.
Semeıde 500 gr bolatyn ırandyq qurmany 700-1000 teńgege satyp alýǵa bolady. Al Saýd Arabııasynyń ónimi 3000-5000 teńge turady. Pavlodarda salmaǵy 500 gr bolatyn qurma qoraby — 800 teńge, Petropavl jáne Tarazda — 850 teńge.
Aqtaýda qurma qoraby 800-1000 teńge bolsa, patshalar surpynyń kelisi 5800-7000 teńge. Óskemende ırandyq qurma baǵasy 850-1000 teńge dep kórsetilgen. Al Saýd Arabııasynyń ónimi kelisine 3000-5500 teńge turady.
Astanada salmaǵy 500 gr bolatyn qurma baǵasy — 899-1399 teńge. Al salmaǵy 200 gramdyq ajýa qurmasy 519 teńge turady. Syılyqqa arnalǵan qoraptaǵy qurma quny — 7775 teńge.
Oral men Taldyqorǵanda 500 gramdyq qurma qoraby — 1000-1500 teńge. Aqtóbede baǵa — 1001 teńge, al 300 gramdyq qoraptaǵy qurma quny 684 teńge turady. Atyraýda 500 gramdyq ırandyq qurma baǵasy 1160 teńge, 200 gramdyq patshalar surpy 1490 teńge, ajýa qurmasynyń kelisi 9000 teńge turady.
Qostanaıda salmaǵy 500 gramm bolatyn qurma 1260 teńge turady. 200 gramdyq qurmany 500-570 teńgege satyp alýǵa bolady. Patshalar surpynyń kelisi 9000 teńge turady. Qyzylordada 500 gramdyq qurma baǵasy 1900 teńge bolsa, patshalar surpynyń baǵasy (250 gramm) 2940 teńge turady.
Qazirgi kezde shokoladty qurma suranysqa ıe. Aımaqtardyń kópshiliginde 100 gr bolatyn ónim baǵasy 1900 teńgeden bastalyp, salmaǵyna qaraı 5900-12000 teńgege deıin jetedi.
Kazinform buǵan deıin shaı men kofe, buqtyrylǵan et pen balyq baǵasyn salystyrdy.