Qazaqstan qalalarynda qurylys materıaldarynyń baǵasy qansha turady

ASTANA. KAZINFORM - Astana men Almaty qurylys materıaldary qymbat qalalar qataryna kirmedi. Qazaqstan boıynsha eń arzan jáne eń qymbat materıaldar arasyndaǵy aıyrmashylyq 40% bolyp tur, dep habarlaıdy Kazinform agenttiniń tilshisi.

Úı qurylysy nemese jóndeý jumystary kezinde eń birinshi másele qurylys materıaldarynyń baǵasyna kelip tireledi. Biz jeke jáne kommertsııalyq qurylys kezinde jıi qoldanylatyn materıaldardy tańdadyq. Árıne, eń birinshi qurylysqa kirpish qajet. Biz M150 sılıkat kirpishiniń baǵasyn bildik. Bul qabyrǵa úshin berik ári qoljetimdi kirpish túri. Kirpishti qalaý ońaı ári jylýdy jaqsy saqtaıdy, qalaýshy epti bolsa úı men ǵımarattyń sánin de keltirip turady.

Keıin bizge beton qajet. Kóp taraǵan M200 markaly ámbebap nusqasy tańdaldy. Bul irgetasty qalaý kezinde óte yńǵaıly ári jol qurylysyna, jabyndyǵa jaramdy. Sonymen birge eden quıý, baspaldaq pen temirbeton konstrýktsııasynda qoldanýǵa bolady.

Taǵy bir qajetti qurylys materıaly - armatýra. Durys tańdaý – óner. Sondyqtan biz statıstıkaǵa súıenip, naryqta suranysqa ıe dıametri 12 mm bolatyn kedir-budyrly A3 markaly (temirbeton qurastyrylymy kezinde beriktigin qamtamasyz etýge paıdalanady) armatýrany tańdap aldyq.

Ári qaraı 100×100 mm bolatyn uzyndyǵy 6 metrlik aǵash bileý tańdaldy. Bul úı, monsha, saraı sekildi qurylysta keń qoldanylady. Ony tireýish retinde qoldanyp, shatyrdy kóterýge paıdalanady.

Keıin jylý saqtaýǵa arnalǵan qurylys materıalyna toqtalamyz. Biz qalyńdyǵy 50 mm bolatyn mıneraldy maqtany tańdadyq. Bul jylý men artyq shýdan qorǵaıdy.

Baǵany esepteý ádisi

Saraptaý úshin habarlandyrý saıttary men qurylys kompanııalarynyń paraqshalaryndaǵy baǵalar negizge alyndy. Naqty bolýy úshin 500 dana kirpish (kóbine kirpish baǵasy ár danasyna esepteledi, biz ondaǵan habarlamany qarap, ortasha baǵa tańdadyq) alyndy. Al beton óndirýshiler ár tekshe metrin esepteıdi. Dál osy ólshemniń baǵasyn salystyrdyq. Armatýranyń ortaq baǵasyn esepteý qıynǵa tústi. Sebebi keıbir satýshy onyń ár danasyn baǵalasa, keıbiri tekshe metrin, taǵy biri metrin, ózgesi kelisine qaraı saralaıdy. Biz salmaǵy 100 keli bolatyn 114 metrlik armatýrany tańdadyq. Sonymen birge 10 dana aǵash pen 10 qorap mıneraldy maqta (qalyńdyǵy 50 mm bolady) tańdaldy.

Eń qymbat qalalar:

Eń joǵary baǵa Qostanaıda bolyp shyqty. Munda biz tańdaǵan 5 qurylys materıalynyń bári qymbat. 500 dana kirpish baǵasy – 67 500 teńge. Al betonnyń tekshe metri 32 650 teńge turady. Bir tsentner armatýra quny – 31 000 teńge, al 10 aǵash bileý 45 000, jylý ustaıtyn maqta 68 000 teńge. Mamandar munyń sebebin logıstıka jáne suranysqa baılanysty dep otyr. Qajetti soma - 244 150 teńge.

Qazaqstannyń óndiristi astanasy sanalatyn Qaraǵandyda da baǵa joǵary. Munda qurylys materıalyna suranys joǵary, baǵasy da kóńil kónshitpeı tur. Kirpish baǵasy elimiz boıynsha eń qymbat, ıaǵnı, 500 danasy orta eseppen 75 000 teńge turady. Al armatýra eń arzan, 100 kelisiniń baǵasy – 28 900 teńge. Al ózge qalalarda armatýra kem degende 30 000 teńge turady.

Óskemende armatýra men aǵash qymbat. Tizim boıynsha tańdalǵan qurylys materıaldarynyń quny munda 237 700 teńgege shyqty.

Qymbat qurylys materıaldary.

Elimiz boıynsha eń qymbat beton Atyraý qalasynda bolyp shyqty. Munda tekshe metri 35 400 teńgege satylyp jatyr. Sonymen birge bul óńirde aǵash ta qymbat.

Al Almatyda beton baǵasy arzan. Munda tekshe metri 14 350 teńge turady. Biraq bul qalada kirpish pen armatýra qymbat. Sonymen birge elimiz boıynsha eń qymbat jylý ustaıtyn maqta Almatyda satylady. Munda 10 danasy salynǵan bir býmasy 69 500 teńge turady.

Shymkentte kirpish baǵasy qymbat. Al beton men armatýra baǵasy ózge óńirlerge qaraǵanda ortasha bolyp tur.

Jezqazǵanda beton baǵasy arzan. Biraq kirpish pen aǵash kórshiles óńirlerge qaraǵanda qymbat bolyp shyqty.

Elimiz boıynsha ortasha baǵa:

Aqtóbede 500 dana kirpish orta eseppen 63 000 teńgege satylyp jatyr. Esesine munda beton men armatýra baǵasy tómen.

Kókshetaýda jylý ustaıtyn maqta baǵasy qoljetimdi. Al armatýra, kirpish pen beton baǵasy tómen. Degenmen munda 10 dana aǵash 64 000 teńge turady. Bul baǵa ózge óńirlerge qaraǵanda joǵary degen sóz.

Semeıde aǵash baǵasy tómen. 10 danasy 44 800 teńge turady. Biraq kirpish baǵasy joǵary.

Taldyqorǵanda kirpish baǵasy joǵary, al ózge qurylys materıaldarynyń quny tómen.

Ortasha baǵadan tómen:

Elimiz boıynsha eń qymbat armatýra Túrkistan qalasynda bolyp shyqty. Munda tsentneri 52 000 teńge turady. Al 500 dana kirpish quny 31 250 teńge turady. Bul arzan.

Bir qyzyǵy Astanada baǵa ózge óńirlerge qaraǵanda tómen. Munda suranys joǵary, biraq logıstıka jaqsy jolǵa qoıylǵan. Aǵash qymbat bolǵanymen, ózge qurylys materıaldarynyń quny ortasha. Al jylý ustaıtyn maqta basqa óńirlerge qaraǵanda arzan.

Aqtaýda kirpish pen beton arzan, al ózge qurylys materıaldarynyń ortasha baǵasy qaltaǵa salmaq túsiredi.

Petropavlda kirpish baǵasy arzan, biraq beton qymbat.

Pavlodarda beton arzan, biraq aǵash qymbat.

Qurylys materıaldary eń arzan óńirler:

Oralda aǵash arzan, ózge qurylys materıaldarynyń quny da ortasha baǵadan tómen. Tizimde kórsetilgen qurylys materıaldaryn 184 700 teńgege satyp alýǵa bolady.

Qyzylordada kirpish pen beton baǵasy qoljetimdi, al armatýra quny ortasha baǵadan joǵary. Munda jylý ustaıtyn maqta baǵasy 35 000 teńge turady. Jalpy tizimde kórsetilgen qurylys materıaldaryn 177 700 teńge satyp alady.

Tarazda kirpish pen beton quny tómen, al ózge qurylys materıaldarynyń ortasha quny joǵary bolyp tur. Jalpy quny - 176 950 teńge.

Al eń arzan qurylys materıaldary Qonaev qalasynda. Munda barlyq qurylys materıaly qoljetimdi. Tizimde tańdalǵanyn qosa eseptegende 173 700 teńgege shyǵyp tur.

Buǵan deıin Qazaqstanda jóndeý júrgiz quny qansha turatynyn bildik.