Qazaqstan qalalarynda kosmetolog qyzmetiniń quny qansha
Kosmetologııa qyzmetiniń ishinde pılıng jáne betti tazalaýǵa suranys joǵary. Suranys birkelki joǵary bolǵanymen qalalarda qyzmet quny ártúrli. Kazinform agenttiginiń tilshisi qaı qalada arzan jáne qaısysynda qymbat ekenin bildi.
Naryqtaǵy shynaıy baǵany bilý úshin salon men jeke kosmetologııadaǵy usynys saralandy.
Eń arzany Oral qalasynda bolyp shyqty. Munda bet tazartý qyzmetiniń ortasha quny 5 000 teńgeden bastalyp, 10 000 teńgege jetedi. Al ýltradybystyq jáne apparatpen tazartý quny 10 000 — 15 000 teńge aralyǵynda. Tereń nemese aralas tazartý (ýltradybystyq+mehanıka+kútim) baǵasy odan da qymbat bolady. Pılıng te tereń tazartý men quramyna qaraı birneshe túrge bólinedi. Jeńil túri 5 000 — 10 000 teńge, ortashasy 10 000 — 20 000 teńge, al arnaıy tazartý pılınginiń baǵasy 15 000 teńgeden bastalyp quny joǵarylaı beredi. Pılıngti kóbine betti tazartqan soń qoldanady.
Pavlodar qalasynda kosmetologııa qyzmeti, onyń ishinde pılıng túri men tereńdigine qaraı 10 000 — 25 000 teńge bolyp tur. Betti qarapaıym ári tolyq, apparatpen tazartý baǵasy — 5 000 — 15 000 teńge aralyǵynda.
Qaraǵandy qalasyndaǵy baǵa mynadaı: hımııalyq ortasha pılıng — 20 500 teńge jáne odan joǵary, mehanıkalyq pılıng — 27 000 teńge jáne odan joǵary. Betti tazartý, maska jaǵyp, pılıng jasaý orta eseppen 12 000 — 20 000 teńge. Ýltradybystyq tazartý jáne pılıng baǵasy 5 000 — 12 000 teńge aralyǵynda. Al mehanıkalyq (qolmen) tazartý qyzmeti — 5 000 — 6 000 teńge bolyp tur.
Jezqazǵanda baǵa Qaraǵandyǵa qaraǵanda sál joǵary. Munda ýltradybystyq tazartý baǵasy — 5 500 — 13 200 teńge. Al mehanıkalyq tazartý baǵasy — 5 500 — 6 600 teńge. Pılıng qyzmetiniń quny — 22 500 — 30 000 teńge aralyǵynda. Aralas qyzmet (betti tazartts, maska jáne pılıng) orta eseppen 13 200 — 22 000 teńgege shyǵady.
Shymkenttegi kosmetologııada betti mehanıkalyq jáne aralas tazartý quny 7 000 — 8 000 teńge. Keshendi qyzmet quny keıde 20 000 teńgege deıin jetedi. Al pılıng qyzmetiniń quny — 3 000 — 30 000 teńge jáne odan joǵary (mehanıkalyq, hımııalyq, lazerli, apparatpen). Mezoterapııa qyzmetin de usynady. Fraktsııalyq qyzmet 5 000 teńgeden, emdik 7 500 teńgeden bastalady. Denege arnalǵany — 40 000 teńge, plazmalyq lıftıng — 30 000 teńge, erindi úlkeıtý 35 000 teńge jáne odan joǵary.
Túrkistanda pılıngti adamnyń bet terisine qaraı jasap beredi. Ortasha pılıng qyzmetiniń quny 6 000 teńgeden bastalyp, 15 000 teńgege deıin jetedi. Betti tazartý qyzmetiniń quny klassıkalyq úlgiden aralas ári apparatqa baılanysty ártúrli bolyp tur. Baǵasy 8 000 — 20 000 teńge aralyǵynda.
Aqtóbe qalasynda da baǵa qoljetimdi. Keıbir salonda «betti tazartý + pılıng» qyzmetiniń quny orta eseppen 8 000 teńge, al mehanıkalyq jáne ýltradybystyq tazartý quny 14 000 teńge bolsa, enzımdi tazartý qyzmetiniń quny — 20 000 teńge, plazmalyq lıftıng — 18 000 teńge. Pılıng jáne kútim túri: jeńil-jelpi pılıng — 12 000 teńge, tereń pılıng — 20 000 teńge jáne odan joǵary. Arnaıy apparatpen massaj jasaý qyzmeti — 5 000 teńge. Bet pen shashqa arnalǵan plazmalyq lıftıng qyzmetiniń quny — 10 000 teńge, bıorevıtalızatsııa jáne mezoterapııa 13 000 teńge, botoks — 15 000 teńge, erindi úlkeıtý — 25 000 teńge.
Qonaev qalasynda badamdy pılıngtiń baǵasy 9 000 teńgeden bastalady, qyshqyldy pılıngter — 10 000 teńgeden joǵary. Teri túrine baılanysty bet tazalaý 10 000 teńgeden bastalady, al aralas nemese ýltradybystyq tazalaý quny orta eseppen 12 000 teńge.
Qostanaı qalasynda da baǵa qoljetimdi bolyp tur. Mehanıkalyq bet tazalaý qyzmeti 10 000 teńgeden bastalsa, al keshendi tazalaý shamamen 22 000 teńge. Pılıngter teriniń qalpy men áser etý tereńdigine qaraı jeke tańdalady jáne ortasha eseppen baǵasy 10 000–17 000 teńge aralyǵynda.
Taraz turǵyndary úshin bet terisine kútim jasaý qyzmetiniń quny ortasha. Bet tazalaýdyń túrine qaraı (negizgi, aralas, apparattyq) baǵasy 10 000–18 000 teńge aralyǵynda. Pılıngter de jeke tańdalady: jeńil qyzmet 8 000 teńgeden bastalsa, tereń ári jan-jaqty túrleri 15 000 teńgege deıin jetedi.
Qyzylorda turǵyndary úshin bet tazalaý qyzmetiniń baǵasy 10 000 teńge, al pılıng jasatsa bólek 5 000 teńge tóleıdi. Basqa qyzmetter qatarynda: gıpergıdrozdy emdeý — 45 000 teńge, lıpolıtıkter — 50 000 teńge, muryn-eringe arnalǵany — 30 000 teńge, ıek korrektsııasy — 35 000 teńge, «Venera saqınalaryn» túzetý — 35 000 teńge, «Djolı profıli» protsedýrasy — 80 000 teńge (4 ml), rınoplastıka — 35 000 teńge.
Kókshetaýda negizgi kosmetologııalyq protsedýralar klassıkalyq ta, premıým segmentte de usynylǵan. Ispandyq dermatokosmetıkamen jasalatyn aralas bet tazalaý 15 000 teńge, standartty bet tazalaý — 12 000 teńge. Pılıngter teriniń jaǵdaıyna qaraı jeke tańdalady: baǵasy 5 000 teńgeden bastalyp, tereń áser etetini 15 000 teńgejáne odan joǵary.
Almatyda bet tazalaý (aralas, mehanıkalyq, ýltradybystyq nemese gıdra-tazalaý) protsedýranyń túri men tereńdigine baılanysty baǵasy shamamen — 15 000–45 000 teńge (apparattyq gıdra-tazalaý, emdik tazalaý jáne t. b.). Hımııalyq nemese jeńil-jelpi pılıng baǵasy shamamen 9 000–15 000 teńgeden bastalady, al tereń nemese qyshqyldy pılıngter quny ádette 15 000–25 000–30 000 teńgeden joǵary.
Aqtaýda jasartatyn áseri bar sýper-pılıng (tazalaý jáne maskamen) baǵasy shamamen 6 000–10 000 teńge, al klassıkalyq kosmetıkalyq bet tazalaý qyzmetiniń quny 15 000–20 000 teńge shamasynda. Jeke kabınetterde aralas bet tazalaý baǵasy ortasha eseppen — 25 000 teńge.
Semeıde bet terisine kútim jasaý quny 10 000 teńgeden bastalady. Ýltradybystyq, mehanıkalyq tazalaý jáne jeńil-jelpi pılıngti qamtıtyn aralas bet tazalaý 25 000 teńge, kútimdik protsedýralar — 15 000 teńge. Keńes alǵan soń pılıng jeke tańdalady jáne baǵasy orta eseppen 10 000–20 000 teńge aralyǵynda. Jeńil pılıngter — 10 000 teńge, barlyq maýsymǵa arnalǵan pılıngter — 15 000–20 000 teńge.
Astanada bet tazalaý (ýltradybystyq, mehanıkalyq, aralas nemese gıdra-tazalaý) ádette salon deńgeıi men ádisine qaraı 15 000–50 000 teńge aralyǵynda. Jeńil pılıng (jeńil, kosmetıkalyq) — shamamen 8 000–15 000 teńge, ortasha deńgeıdegileri (glıkoldi, Djessner, retınoıdty) — 15 000–25 000 teńge, al tereń qyshqyldy pılıngter — 20 000–35 000–40 000 teńgeden bastalady. Premıým klınıkalarda baǵa 100 000 teńgege deıin jetýi múmkin.
Petropavlda mehanıkalyq, ýltradybystyq jáne ızraıldik bet tazalaý jáne pılıng 16 000 teńge turady. Bezeýdi emdeýge jáne terini jasartýǵa arnalǵan hımııalyq pılıngter — 15 000 teńge, aǵartýǵa arnalǵan retınoldy pılıng — 25 000 teńge. Qosymsha qyzmetter: gıgıenalyq bet massajy — 7 000 teńge, lıftıng-massaj — 15 000 teńge, bezeýdi lazermen emdeý — 10 000 teńge, GUINOT (Frantsııa) gıdrodermııasy — 25 000 teńge usynylady.
Atyraýda bet terisine kútim jasaý baǵalary el boıynsha ortasha deńgeıden joǵary. Bet tazalaý 17 000–25 000 teńge, ottekti pılıng — 20 000 teńge, ósimdik negizindegi pılıng baǵasy — 23 000 teńge. Marjan (korall) pılıngi sııaqty protsedýralar quny 30 000–40 000 teńge aralyǵynda.
Óskemende de baǵa joǵary. Aralas bet tazalaý — 17 000 teńge, al barlyq maýsymǵa arnalǵan pılıng qosylǵan aralas tazalaý — 25 000 teńge. Barlyq maýsymdyq pılıng — 17 000 teńge, retınol negizindegi maýsymdyq pılıng baǵasy — 18 000 teńge.
Taldyqorǵanda bet tazalaý qyzmeti — 20 000 teńge. Pılıngtiń birneshe túri bar: Djessner pılıngi — 15 000 teńge, retınoldy pılıng — 25 000 teńge, sondaı-aq Lanez Skin, BioRePeel jáne PRX-T33 sekildi tanymal ádister baǵasy orta eseppen 20 000 teńge. (tańdalǵan preparat pen teri jaǵdaıyna baılanysty).
Buǵan deıin Kazinform Qazaqstan qalalaryndaǵy býhgalterlik qyzmetterdiń baǵasy týraly jazdy.