Qazaqstan qalalarynda qyzyl jáne qara ýyldyryqtyń baǵasy qansha

ASTANA. KAZINFORM - Qyzyl ýyldyryq – kóp taralǵan jeńsik as. Qazirgi kezde baǵasy ár óńirde ártúrli. Kez kelgen adamnyń satyp alýǵa qaltasy kótermeıdi. Al qara ýyldyryqty tabý, satyp alý odan da qıyn, dep habarlaıdy Kazinform agenttiginiń tilshisi.

Dúkenderde qunysbalyq, baqtaq, keta, nerka balyqtarynyń qyzyl ýyldyryǵy satylady. Baǵany salystyrý kezinde salmaǵy 100 gramm bolatyn ónim alyndy. Bir aıta keterligi, tabıǵı ýyldyryq keıbir qaladan, dúkennen tabylmady. Qara ýyldyryq baǵasy tipti aspandap tur. Sondyqtan bolar, ony óte sırek keziktiremiz.

Eń arzany Shymkent qalasynda bolyp shyqty. Munda 100 gramm qyzyl ýyldyryqty 2400 teńgege tabýǵa bolady. Megapolısten qara ýyldyryq ta tabylady. Dúken sórelerinde 100 gramm qara ýyldyryq quny 32 000 teńgeden bastalady.

Odan keıingi orynda Jezqazǵan qalasy tur. Munda 100 gramm qyzyl ýyldyryq quny - 2500 teńge. Qaladan qara ýyldyryqty tabý múmkin emes. Alaıda bir saýda núktesi tapsyryspen jetkizip berýge kelisti. Ol úshin aldyn ala tólem suramaıdy. Aıtyp óteıik, qara ýyldyryqty teńiz ónimderin satatyn arnaıy dúkenderden ǵana kezdestirýge bolady.

Óskemende qyzyl ýyldyryq quny 2800 teńgeden bastalady. Al Oralda odan qymbattyraq. Munda 100 gramm ýyldyryq baǵasy 3400 teńge turady. Eki qaladan da qara ýyldyryq tabylmady.

Tarazda qara ýyldyryq bar. Bul qalada qara ýyldyryqtyń 100 gramy 29 000 teńge turady. Al qyzyl ýyldyryq quny - 3500 teńge. Aqtaý qalasynda qyzyl ýyldyryq quny 3600 teńge turady. Munda da qara ýyldyryq satylady. Tek 100 gramm ýyldyryq 47 000 teńge turady. Aqtaýda qymbat jeńsik as shyǵaratyn kásiporyn da ashylǵan.

Odan keıingi orynda Kókshetaý qalasy tur. Munda qyzyl ýyldyryq baǵasy 4200 teńgeden bastalady. Atyraý men Semeıde sál qymbat. Munda 100 gramm jeńsik as baǵasy 4200 teńgeden bastalady. Bul qalalarda qara ýyldyryq joq.

Reıtıngtiń orta tusynda Pavlodar qalasy tur. Munda qyzyl ýyldyryq baǵasy 4500 teńge. Al 100 gramm qara ýyldyryq quny 30 000 teńgeden bastalady.

Aqtóbede 100 gramm qyzyl ýyldyryq 4600, al Astanada 5660 teńge turady. Elimizdiń astanasynda qara ýyldyryq bar jáne onyń baǵasy 37 000 teńgeden bastalady.

Astanadan keıin Petropavl qalasy tur. Munda qyzyl ýyldyryq quny 5760 teńgeden bastalady. Qara jeńsik astyń eń arzany 37 000 teńge turady. Taldyqorǵanda qyzyl ýyldyryq quny sál qymbattaý. 100 gramm ýyldyryq baǵasy - 5980 teńge. Elimiz boıynsha eń qymbat qara ýyldyryq osy óńirde bolyp shyqty. 100 gramm ónim baǵasy 50 000 teńgeden bastalady.

Úshinshi orynda Qaraǵandy qalasy tur. Munda qyzyl ýyldyryq quny 6000 teńgeden bastalady. Qara ýyldyryq quny 29 000 teńge turady.

Ekinshi orynda - Qostanaı qalasy. Munda 100 gramm qyzyl ýyldyryq baǵasy - 6500 teńge. Al elimiz boıynsha eń arzan qara ýyldyryq Qostanaıda bolyp tur. Munda 100 gramm jeńsik as 17 000 teńge turady.

Birinshi orynda - Almaty qalasy. Munda qyzyl ýyldyryq baǵasy 7000 teńgeden bastalady. Al qara ýyldyryq quny 30 000 teńgeden bastalady.

Eske salsaq, buǵan deıin nan jáne birinshi surypty un baǵasyn, makaron ónimderiniń qunyn saralandy. Sonymen birge Kazinform irimshik pen shujyqtyń qaı óńirde arzan, qaısysynda qymbat ekenin bildi.

Aıta keteıik, kartop baǵasyn turaqtandyrý úshin Qazaqstannan ózge elge satýǵa shekteý qoıyldy. Bul shekteý 6 aıǵa sozylady.