Qazaqstan qalalarynda qymyz ben shubat baǵasy qansha
ASTANA. KAZINFORM — Ramazan aıynda elimizde qymyz ben shubatqa suranys artty. Jurtshylyq bul sýsyndy kóbine ulttyq tabıǵı ónim dep satyp alady, dep habarlaıdy Kazinform agenttiginiń tilshisi.
Óńirlerdegi baǵany salystyrǵan kezde qymyzdyń lıtri 1 200 — 3 000 teńge, al shubat 1 000 — 4 000 teńge ekenin bildik. Eki sýsyn baǵasy elimizdiń ońtústik óńirlerinde tómen.
Atap aıtar bolsaq, Tarazda qymyz ben shubattyń lıtri 1 200 — 1 500 teńge. Al Túrkistan qalasynda shubat baǵasy 1 200 teńge, qymyzdyń lıtri — 1 400 teńge. Qyzylorda qalasynda qymyzdyń lıtri 1 350 teńge bolsa, shubat baǵasy — 1 400 teńge. Óskemen qalasynda ulttyq sýsynnyń ekeýi de 1 300 teńgege satylyp jatyr. Al Taldyqorǵanda qymyz baǵasy orta eseppen 1 500 teńge.
Pavlodar qalasynda qymyzdyń lıtri 1 800 — 2 000 teńge (jazda baǵa tómendeıdi), al Baıanaýylda shubatty 1 000 teńgege satyp alýǵa bolady. Petropavlda qymyzdyń lıtri 1 500 — 1 800 teńge, al shubatty tappaısyz. Oral qalasynda eki sýsynnyń da baǵasy — 2 000 teńge.
Elimizdiń ortalyǵy men batysynda baǵa joǵary. Qaraǵandy qalasynda shubattyń lıtri — 1 800 — 2 200, qymyz — 2000–2500 teńge. Jezqazǵanda qymyzdy 2 000 — 3 000 teńgege, shubatty — 2 000 — 2 400 teńgege satady. Aqtóbe qalasynda shubattyń baǵasy 2 200 teńge, al qymyz baǵasy 1 520 — 2 277 teńge aralyǵynda. Munda Araldan ákelingen shubattyń lıtri 1 800 teńge bolyp tur.
Qostanaı qalasynda shubattyń lıtri — 4 000 teńge. Bul elimizdegi joǵary baǵanyń biri. Jylqy baılaıtyn adamdarda qymyzdyń lıtri — 1 200 — 1 500 teńge, al tsehta óndirilgeni shamamen 2 100 teńge. Kókshetaý qalasynda qymyz baǵasy — 2 950 teńge, shubat — 1 700 teńge. Aqtaýda qymyzdyń lıtri — 1 800 — 3 000 teńge aralyǵyndy, shubat — 1 200 teńge.
Shymkentte qymyz ben shubat baǵasy — 1 200 teńge. Al bótelkedegi shubat baǵasy (4%) — 1 150 teńge.
Óńirler arasyndaǵy baǵa aıyrmashylyǵy óndiriske, maýsymǵa jáne suranysqa baılanysty. Jazda ulttyq sýsyn baǵasy tómendeıdi. Baǵa aıyrmashylyǵyna qaramastan Ramazan aıynda qymyz ben shubat suranysy joǵary sýsyn bolyp qala bermek.
Buǵan deıin Qazaqstan qalalaryndaǵy qurma baǵasy týraly jazyldy.
