Qazaqstan qalalarynda kıimdi hımııalyq tazalaý qyzmetiniń quny qansha
ASTANA. KAZINFORM – Qazaqstan qalalarynda kúrte, ton men kóılekti hımııalyq tazalaýdan ótkizý quny ártúrli. Qaı óńirde kıimdi tazalaý arzanǵa túsetinin Kazinform agenttiginiń tilshisi anyqtap bildi.
Ár úıde turmystyq tehnıka bar. Soǵan qaramastan hımııalyq tazalaý qyzmetine suranys joǵary. Adamdar kóbine jýylýy qıyn syrt kıimderin, kóılek pen jeıde, kostıýmdi arnaıy oryndarǵa tapsyrady. Baǵasy ártúrli. Oǵan matasy, kıimniń qanshalyqty las ekeni, ondaǵy daq áser etedi. Sonymen birge útikteý, býmen tazalaý sekildi qyzmet túrleri de bar.
Ózge óńirlerge qaraǵanda Atyraýda hımııalyq tazalaý qyzmetiniń quny tómen. Kúndelikti kııýge arnalǵan jeıdeni 1 100 teńgege, fýtbolka, ishkóılekti 900 teńgege tazartyp beredi. Al áıelderdiń kóılegin (kúndelikti kıetin) tazalaý quny 2 100 teńgeden bastalyp, 4 700 teńgege deıin barady. Toı kóıletin tazartý – 8 500-17 000 teńge. Kostıýmderge 4 000-5000 teńge tóleýge týra keledi. Al sporttyq kıimge 2 700 teńge suraıdy. Arnaıy kıimdi tazalaý quny – 4 600-6 000 teńge. Kúrtelerdi tazalaý qyzmeti 2 750 teńgeden bastalady. Al qalyń kúrteni 3 300, bylǵary aralasyn 4 400 teńgege hımııalyq óńdeýden ótkizedi. Paltony qalyńdyǵy men onyń matasyna qaraı 4 600-7 000 teńgege tazalaıdy. Jasandy materıaldan tikken syrma tondardy 8 000-13 000 teńgege tazartady. Al taza teriden tikkenin tazalaý baǵasy 13 000-20 000 teńge. Sondaı-aq jasandy materıaldan tigilgen tondy 4 600-6 900 teńgege, al kundyz tondardy 11 500-17 000 teńgege tazartady.
Sonymen birge ózge óńirlerge qaraǵanda Pavlodarda da baǵa qoljetimdi. Munda jeıde men fýtbolkany tazartý baǵasy 1 000-2 000 teńge aralyǵynda. Al áıelder kóılegin tazartsa matasy men dızaınyna qaraı 3 000-6 000 teńge suraıdy. Toı kóılegin tazartý quny odan joǵary. Orta eseppen – 7 000 teńgeden bastalyp, 15 000 teńgege jetedi. Klassıkalyq úlgidegi kostıýmdi tazalaýǵa orta esepen 2 000-3 000 teńge kerek. Al kúrtelerdi 3 000-5 000 teńgege tazartady. Syrma tondarǵa – 3 600-5 000 teńge. Tondardy tazartý kezinde qyzmet kórsetýshiler uzyndyǵyna basa mán beredi. Ań terisinen tigilgen qundyz tondardy 10 000 teńgeden tazarta bastasa, jasandy materıaldan kıgen syrt kıimińizdi 3 500-5 000 teńgege retke keltirip beredi.
Kókshetaýda syrt kıim men jeńil kıimdi tazalaý baǵasy sál joǵary. Munda jeıde, fýtbolkany 1 500 teńgege tazartyp beredi. Er adamdardyń kostıým-shalbaryn tazartý quny 5 000 teńgeden bastalsa, áıelderdiń kıimi 6 000 teńge bolyp tur. Kúndelikti kıetin kóılekterdi 4 500, sándi kóılekti 8 000 teńgege qabyldap, tazartady. Kúrtelerdi tazartý 6 000-8 000, kóktemge arnalǵan syrt kıimdi retke keltirý – 3 500 teńge. Qalyń kúrtelerdi tazartý quny 4 500-5 000 teńge dep kórsetilgen. Al syrma ton men jasandy materıaldan tigilgen tondardy 8 000-12 000 teńgege tazartady.
Petropavldaǵy hımııalyq tazalaý oryndarynyń baǵasynda asa úlken aıyrmashylyq baıqalmaıdy. Eresekterge arnalǵan kúrteni 6 000, balalardyń syrt kıimin 4 000 teńgege tazartady. Jasandy tondy tazartý quny – 6 000-7 000 teńge. Al palto men men jasandy materıaldan tikken tondy 7 000-8 000 teńgege tazartady. Klassıkalyq kostıým – 6 000–7 000 teńge, jeıde pen fýtbolka – 1 500 teńge. Kóılekterdi tazalaý baǵasy 5 000-20 000 teńge aralyǵynda. Munda da toı kóılegin tazartý baǵasy joǵary.
Shymkentte hımııalyq tazalaýdaǵy baǵa kıim úlgisine qaraı ártúrli. Jeıde men fýtbolkany 1 800-2 200 teńgege tazartady. Kostıým – 4 800-5 000 teńge aralyǵynda. Kóılekti 3 000-6 500 teńgege, toı kóılegin 4 000-10 000 teńgege tazalap beredi. Kúrtelerdi tazartý quny 4 800 teńgeden bastalyp, qalyń bolsa 5 000-6 000 teńge suraıdy. Al paltony 4 300-6 000 teńgege tazartyp alasyz. Tondardy tazartý kezinde onyń qaı ańnyń terisinen tigilgeni, uzyndyǵy mańyzdy. Qundyz tondardy tazartý quny – 7 500-9 000 teńge.
Aqtóbedegi qyzmet quny mynadaı: fýtbolka men jeıde – 2 000 teńge. Kóılek 5 000-9 000 teńge aralyǵynda. Toı kóılegin tazalaý qyzmeti keıde 28 000 teńgege deıin barady. Er adamdardyń kostıýmin 6 000-7 000 teńgege tazalaıdy. Al arnaıy kıimder – 9 000-15 000 teńge aralyǵynda. Ań terisinen tigilgen tondardy 12 000-25 000 teńgege tazalaıdy. Al syrma tondardy 15 000-20 000 teńgege, kúrtelerdi 7 000-9 000 teńgege, paltony 6 000-7 000 teńgege qabyldaıdy.
Aqtaýdaǵy hımııalyq tazalaý oryndarynyń qyzmeti: jeıde men fýtbolka – 2 000-2 500 teńge aralyǵynda. Kostıým, sonymen birge sporttyq kıim – 4 000-4 500 teńge. Kóılek 5 000-7 000 teńge, toı kóılegi 10 000 – 20 000 teńge aralyǵynda. Kúrte men tondy tazalaý qyzmetiniń quny 5 000 teńgeden bastalady. Palto pen jasandy materıaldan tigilgen tondardy hımııalyq óńdeýden ótkizý quny 5 000-7 000 teńge. Bylǵary tondar 13 000-15 000 teńge turady. Al arnaıy kıimder 5 000-7 000 teńge.
Tarazda da hımııalyq tazartý qyzmetiniń quny kóńilge qonymdy. Fýtbolka men jeıde 2 000-3 000 teńge, kostıým-shalbar tazalaý 5 000-7 000 teńge, kóılek – 3 000-9 000 teńge aralyǵynda. Al tondardy 9 000-12 000 teńgege, syrma tondardy 7 000-11 000 teńgege, kúrtelerdi 3 000-10 000 teńgege tazalaıdy.
Óskemendikter kostıým-shalbardy 7 500 teńgege, kóılekti 5 000 teńgege, fýtbolkany 2 000 teńgege tazartyp alady. Syrt kıim: ton – 14 000 teńge, syrma ton – 15 000 teńge. Kúrteni matasyna qaraı 6 800-9 000 teńgege tazalaıdy.
Almatyda fýtbolkany 2 100-3 200 teńgege, jeıdeni 2 300-5 000 teńgege tazartyp beredi. Al kostıýmderdi 6 500-7 300 teńgege hımııalyq óńdeýden ótkizedi. Dara kostıýmdi tazalaý quny – 5 000 teńge. Hımııalyq óńdeý oryndarynda áıelderdiń kóılegin tazartý quny 4 700 teńgeden bastalady. Keshke arnalǵan sándi kóılekterdi 6 200-8 200 teńgege, qalyńdyq kóılegin 14 000-23 000 teńgege hımııalyq óńdeýden ótkizedi. Paltony 8 200, kúrteni 4 700-10 400 teńgege tazartady. Jaǵasy bylǵarydan tigilgen bolsa baǵa da joǵary bola túsedi. Bylǵarydan tigilgen syrma tondardy 16 000-25 000 teńgege qabyldap, tazartady. Tondardy tazalaǵan kezde neden tigilgenine basa mán beredi. Jasandy materıaldan tigilgen tondy 10 000 teńgege, taza bylǵanydan tigilgen syrt kıimdi 12 200-29 200 teńgege óńdeýden ótkizedi. Ásirese qundyz jáne shınshılla terisinen tigilgenin tazartý quny qymbat turady.
Qonaev qalasynda baǵa Almatyǵa uqsas. Kúrteni 4 800 teńgege, qysqa arnalǵan qalyń syrt kıimdi matasy men ishindegi materıalyna qaraı 5 000 teńgege tazartady. Bylǵarydan tigilgen tondardy tazartý quny 7 500 teńgeden bastalyp tur. Jeńil kıimder, onyń ishinde fýtbolka 2 100 teńge, jeńil kóılek 2 700 teńge turady. Tazartý oryndary kostıým-shalbardy 3 200 teńgege, keshke arnalǵan sándi kóılekti 6 000 teńgege qabyldaıdy. Al qalyńdyqtyń kıimi men onyń qajetti zattaryn tazartý qyzmetiniń quny – shamamen 25 000 teńge.
Maýsym almasqanda shkaf ishindegi kıimderdi tazartýdy oıǵa alǵan túrkistandyqtar jeńil kúrteni 3 200 teńgege tapsyrdy. Al qysqa arnalǵan qalyń kúrteni 3 900 teńgege, mamyq nemese jylý saqtaıtyn túrli tabıǵı materıaldan tigilgen kúrtelerdi 4 100 teńgege tazartty. Matasy juqa ári baǵaly syrt kıimderge qyzmetkerler asa uqyppen qaraıdy. Soǵan saı baǵasy da ózgelerge qaraǵanda joǵary bolady. Máselen jasandy syrma tondardy óńdeý quny 7 500 teńgeden bastalsa, bylǵary kúrte quny 7 800 teńge bolyp tur. Kúndelikti kıip júrgen kıimderdi tazalaý qyzmeti bul qalada da ártúrli. Qysqa kóılekti 2 700 teńgege, kostıým-shalbardy 3 200 teńgege, al sándi kóılekti 6 000 teńgege tazartyp beredi. Fýtbolkany hımııalyq óńdeý quny 2 500 teńgeden bastalady.
Oralda da kıimderdi hımııalyq óńdeý qyzmeti qoljetimdi. Ań terisinen tigilgen bylǵary tondardy tazartý qyzmeti 9 950 teńgeden bastalsa, jasandy tondardy 4 790 teńgege tazartady. Kúrtelerdi hımııalyq óńdeý quny 3 000 teńgeden bastalady. Al fýtbolka men jeıdeniń árqaısysyn 3 000 teńgege qabyldap, hımııalyq óńdeýden ótkizedi. Kóılek pen kostıýmdi de osy baǵaǵa, ıaǵnı 3 000 teńgege tazartyp beredi. Al eger kóılektiń túrli áshekeıi bolsa, baǵa 10 000 – 15 000 teńgege deıin jetedi.
Qyzylordada baǵa myndaı: fýtbolka men jeıdeni jýyp, útiktep berýge 3 800 teńge suraıdy. Al tondy hımııalyq óńdeý quny - 14 200 teńge. Qalyń kúrteler – 6 500 teńge. Kostıým-shalbardy hımııalyq óńdeý quny 6 700 teńge, dara kostıým – 5 500 teńge.
Semeıde hımııalyq óńdeý qyzmetiniń quny elimiz boıynsha ortasha deńgeıde. Jeıde men fýtbolkany 2 500-3 000 teńgege tapsyrasyz. Al kóılekti 4 990, keshke arnalǵan sándi kóılekti 10 990, qalyńdyq kóılegin 16 990 teńgege tazartyp beredi. Kostıýmderdi tazartý quny 6 000-8 000 teńge aralyǵynda. Paltony munda 7 490-10 990 teńgege tazartady. Kúrte, sonymen birge shańǵy tebýge arnalǵan sporttyq kıim, qalyń kúrteni 4 490-6 990 teńgege qabyldaıdy. Syrma tondardy 8 990-12 990 teńgege, ań terisinen tigilgen tondardy 10 990 – 22 990 teńgeden qabyldap, hımııalyq óńdeýden ótkizip beredi.
Qaraǵandy men Jezqazǵanda hımııalyq tazalaý qyzmetiniń quny shamalas. Munda taza bylǵarydan tigilgen syrma tondardy 10 000-15 000 teńgege, al jasandy materıaldan tigilgen syrma tondardy 6 000-8 000 teńgege tazartady. Jasandy tondardy tazartý quny da 6 000-8 000 teńge bolsa, ań terisinen tigilgen qymbat tondardy hımııalyq óńdeý quny 10 000-16 000 teńge dep kórsetilgen. Kúrtelerdi hımııalyq óńdeý kezinde 6 000-12 000 teńge, paltoǵa 6 000-8 000 teńge suraıdy. Kostıým-shalbardy 6 000-7 000 teńgege, al jeıde men fýtbolkany shamamen 2 500 teńgege tazartady. Kúndelikti kıip júrgen kóılekti 5 000-8 000 teńge, keshke arnalǵan sándi kóılekti 6 000-10 000 teńgege, qalyńdyq kóılegin 10 000-18 000 teńgege qabyldaıdy.
Taldyqorǵanda baǵa ortashadan sál joǵary. Munda jasandy jáne ań terisinen tigilgen tondardy 12 000-15 000 teńgege tazartady. Al syrma tondardy hımııalyq óńdeý kezinde qyzmetine 10 000 – 14 000 teńge suraıdy. Qalyń kúrtelerdi orta eseppen 6 000-9 000 teńgege qabyldap, tazartyp beredi. Al jeıde, fýtbolka sekildi jeńil kıimdi tazartý quny 2 500 teńgeden bastalyp, 3 500 teńgege deıin jetedi. Kúndelikti kıip júrgen kóılekterdi 4 000-6 000 teńgege, kostıým-shalbaldy 5 500-6 500 teńgege tazartady.
Qostanaıda hımııalyq tazartý oryndarynyń qyzmet aqysy ortashadan joǵary. Tondardy shamamen 17 000-20 000 teńgege tazartady. Al qystyń kúrtelerin 10 800-17 000 teńgege, syrma tondardy 10 000 – 17 000 teńgege qabyldap, óńdep beredi. Fýtbolkany tazartý quny – 3 300 teńge. Kóılekterdi 5 600-8 000 teńgege, kostıýmdi 7 000-8 000 teńgege qabyldaıdy.
Elimiz boıynsha Astanada baǵa joǵary. Munda jeıdeni 2 500, fýtbolkany 2 700 teńgege tazartady. Al jibek matadan tigilgen bolsa qyzmet aqysyn 5 000 teńgege deıin kóteredi. Kúndelikti kıetin kóılekterdi 6 900, sándi kóılekterdi 8 500-9 000 teńgege tazartady. Al qalyńdyq kóılegin 20 000 – 35 000 teńgege qabyldaıdy. Kostıýmdi tazartý quny 6 000-8 200 teńge, pıdjak – 4 500-7 000 teńge aralyǵynda. Shańǵy sportyna arnalǵan kıimdi 10 000 teńgege tazartyp beredi. Al syrt kıimderdi, máselen kúrteni tazartý quny – 5 700-12 000 teńge, palto – 8 000-11 000 teńge, syrma ton – 10 000 – 12 000 teńge. Jasandy materıaldan tigilgen tondardy 10 000-12 000 teńgege, al ań terisinen tigilgenin 15 000 myń teńgege qabyldaıdy. Baǵa tonnyń uzyndyǵyna qaraı óse beredi.
Kazinform buǵan deıin kóship-qoný kezindegi júk tasymalynyń quny týraly jazdy.