Qazaqstan qalalarynda keshendi túski as baǵasy qansha
ASTANA. KAZINFORM – Elimizde keshendi túski astyń ortasha baǵasy – 1 500-2 000 teńge. Biraq túski asqa kiretin taǵam ár qalada ártúrli. Kazinform tilshisi óńirlerdegi baǵany salystyrdy.
Keshendi túski asta qazaq, shyǵys, eýropalyq nemese ózge eldiń as mázirin tańdaýǵa bolady. Ádettegideı sorpa, tartylǵan etten kotlet pen janyna kúrish, makaron nemese kartop ezbesin tańdaýǵa bolady. Keı aspazdar kún saıyn ózderi úılestirgen as mázirin usynady. Jetkizý qyzmeti taǵam baǵasyna kiristiriledi. Al eger ujymǵa tapsyrys berse, tegin aparady. Arnaıy ózińiz ǵana alsańyz, jetkizý baǵasy 500-1000 teńge aralyǵynda bolady.
Oral qalasynda keshendi túski as arzan. Mundaǵy dámhanalar birinshi, ekinshi ystyq tamaq, salat pen nanǵa 900 teńge (birneshe adam tapsyrys berse) alady. Al, ashanalarda qýyrdaqtyń baǵasy 1 200 teńge, dámhanalardaǵy bıznes-lanch baǵasy – 1 600-2 100 teńge aralyǵynda.
Almaty, Aqtóbe, Túrkistan, Qyzylorda, Taldyqorǵanda túski astyń baǵasy 1 200 teńgeden bastalady. Almatyda baǵa – 1 200-1 800 teńge (sorpa, kartop ezbesi men kotlet, týralǵan et qosylǵan tamaq, kúrish, kompot). Ujym bolyp tapsyrys berse bonýs jınap, jeńildik alady.
Aqtóbede de 1 200-1 300 teńge tólep, túski as ishýge bolady. Mázirge borş, rassolnık, laǵman, manty, kúrish pen salat, shyryn kiredi. Túrkistandaǵy dámhanada keshendi túski as quny – 1 200 teńge (laǵman, kúrish, manty, salat pen shyryn). Qyzylordada úsh adam tapsyrys berse, jetkizý qyzmeti tegin. Munda bıznes-lanch baǵasy – 2 000-3 000 teńge. Taldyqorǵanda túski asty 1 200-1 500 teńgege satyp alýǵa bolady. Al dámhanadaǵy bıznes-lanch baǵasy – 3 000-5 000 teńge.
Kókshetaýda túski astyń baǵasy – 1 300-1 600 teńge aralyǵynda. Sorpa, borş, kókónis salatyn, kotlet pen kartop ezbesi, nan ónimi, kompot nemese lımonad alasyz.
Atyraýda keshendi túski as quny – 1 400 teńge. Munda da sorpa (borş, mampar, jasymyq sorpasy), ekinshi taǵam (kúrish, taýyq eti men kartop, kúrish nemese makaron), salat pen nan kiredi. Taǵam mólsherin azaıtyp alýǵa bolady. Quny – 1 200 teńge.
Tarazda keshendi túski asty 1 400-1 600 teńgege usynady. Oǵan sorpa, qoıý tamaq, salat pen kompot kiredi. Kóbi dámhanaǵa baryp, ózi tańdaǵanyna tapsyrys beredi. Ol kezdegi baǵasy – 2 000 teńge. Eýropalyq úlgidegi túski as – 3 000-5 000 teńge.
Óskemende keshendi túski asty 1 500 teńgege satyp alýǵa bolady. Lapsha, kotlet pen onyń janyna kartop, makaron nemese kúrish tańdaısyz. Onymen qosa salaty men kompoty birge beriledi. Qostanaıda dál osy taǵamdy keńsege deıin jetkizip berip, 1 500 teńge alady. Keıde aktsııa uıymdastyryp, baǵany 990 teńge teńgege tómendetedi.
Astanada as máziri ártúrli. Keshendi túski as baǵasy 1 500 teńgeden bastalady. Kóp jerde túski as quny – 1 950 teńge. Oǵan sorpa, ekinshi ystyq tamaq, salat, shyryn men nan kiredi. Baǵasy 2 550-3 850 teńge bolatyn bıznes-lanch bar. Keı jerde adam basyna 4 000 teńgeden bastalady.
Pavlodarda keshendi túski astyń baǵasy ózgeshe esepteledi. Munda 1 600 teńgeniń túski asyna salat, sorpa, laǵman nemese et qosylǵan taǵam, nan ónimi kiredi. Al 1 700 teńgege sorpa, kotlet, kúrish, samsa, salat (sýsyn qosylmaıdy) satyp alýǵa bolady. Qalada 1 890 teńgeniń túski asyna suranys joǵary. Sorpa, kúrish, qus etinen káýap, salat, shaı, tátti men nan ótimdi túski as máziri.
Qaraǵandyda túski astyń baǵasy 1 700 teńgeden bastalady. Oǵan túrli burshaqtan jasalǵan sorpa, taı ádisimen daıyndalǵan taýyq eti, kesek et jáne janyna kartop nemese markaron, salat kiredi. Baǵasy joǵary bıznes-lanchqa «Tsezar» nemese «Grecheskıı» salattary qosylady, manty men mors beredi. Baǵasy – 3 300-4 900 teńge.
Aqtaýda túski as baǵasy – 1 800-2 000 teńge (shevd ústeli) aralyǵynda. Bıznes-lanch baǵasy 2 200 teńgeden bastalady.
Shymkentte túski as baǵasy 1 950 teńgeden bastalady. Eger kúrish+shyryn+nan ónimin alsańyz baǵa – 2 400 teńge. Al et taǵamy – 2 890 teńge, etten jasalǵan ózge taǵam baǵasy – 2 400-2 790 teńge. Koreı jáne shyǵys ashanasynyń taǵamy – 3 500 teńge.
Semeıde keshendi túski asqa 2 000 teńge tóleıdi. Mázirde sorpa, salat, kartop ezbesi nemese makaron qosylǵan kotlet bar. Shyryn bólek esepteledi. Qonaevta keshendi túski as baǵasy – 2 000 teńge. Mázir ishinde rassolnık, solıanka, manty, qýyrylǵan kesek et jáne kókónis salaty bar.
Petropavlda túski as baǵasy – 2 300-3 500 teńge (salat, sorpa, laǵman, et qosylǵan taǵam, nan ónimi, shaı). Úsh adamnan turatyn otbasylyq mázir baǵasy – 5 900-6 700 teńge.
Elimizde keshendi túski as Jezqazǵan qalasynda qymbat. Mundaǵy baǵa – 2 500-5 500 teńge aralyǵynda.
Kazinform buǵan deıin jartylaı daıyn ónim baǵasyn salystyryp jazdy.