Qazaqstan qalalarynda kartop baǵasy qansha
ASTANA. KAZINFORM — Qazaqstandyqtar «ekinshi nan» atap ketken kartop quny elimizdiń óńirlerinde ártúrli. Kazinform agenttiginiń tilshisi óńirlerdegi baǵany salystyrdy.
Qazaqstan, sonyń ishinde postkeńestik elder kartopty jıi tutynady. Kúndelikti taǵamǵa qosady, mereke kúnderi de túrli salat pen asqa aralastyryp, dastarhanǵa qoıady.
Kartopty qaınatýǵa, qýyrýǵa, buqtyrýǵa, túrli sorpa men salatqa qosýǵa bolady. Et, kókónis pen sút ónimderi jáne túrli dámdeýishpen jaqsy úılesedi.
Kartopty jıi tutynýymyzdyń taǵy bir sebebi — qoljetimdiligi. Baǵa qubylyp turǵan kezde kartop satyp alý qaltaǵa kóp salmaq salmaıdy ári otbasy úshin toıymdy as.
Kartop baǵasyna áser etetin birneshe faktor bar. Olar: ózindik quny, saqtaý shyǵyny men logıstıka, deldaldardyń ústemeaqysy. Byltyr kúzde jınalǵan kartopqa qaraǵanda bıylǵy ónim baǵasy joǵary bolady. Bazar men sýpermarkettegi kartop qunyna qaraǵanda áleýmettik saqtandyrý qoryndaǵy kókónis baǵasy tipti arzan.
Baǵany salystyrý kezinde Qazaqstan qalalarynda kartoptyń ortasha quny kelisine 200 — 300 teńge ekenin bildik.
Elimiz boıynsha kartop baǵasy Petropavl qalasynda arzan. Munda kelisi 115 teńge. Al Shymkentte 150 teńge, Túrkistanda 165 teńge. Bul qalalarda surpyna qaraı kelisi 360 teńge, keıde 420 teńgege de satylady.
Ortasha baǵa Semeı men Óskemen (kelisi 200 tg bastalady), Astana (kelisi 207 tg bastalady), Qostanaı (kelisi 212 tg), Kókshetaýda (kelisi 215 tg), sonymen birge Taraz (kelisi 230 tg) jáne Qaraǵandy (kelisi 235 tg) qalalarynda tirkeldi. Al Pavlodar men Jezqazǵanda baǵa sál joǵary. Kelisi 250 teńgeden bastalady. Aqtóbede kelisi 265 tg, Almatyda 289 teńge, Oralda 290 teńge, al Taldyqorǵanda 293 teńge.
Kartop baǵasy Qyzylorda qalasynda qymbat. Kelisi 300 teńgeden bastalady. Al aqtaýlyqtar kelisin kem degende 340 teńgege satyp alyp júr.
Buǵan deıin elimizdegi ulttyq táttiler baǵasy týraly jazǵan bolatynbyz.