Qazaqstan qalalarynda qant baǵasy qansha
ASTANA. KAZINFORM – Elimizde suranysy joǵary áleýmettik taýardyń biri – qant. Qazaqstan qalalarynda onyń baǵasy ártúrli. Kazinform agenttiginiń tilshisi qant baǵasyn salystyrdy. Eń arzan jáne eń qymbatynyń arasyndaǵy aıyrmashylyq keı óńirde 50% boldy.
Kelilep satylatyn qant baǵasyna logıstıka, jergilikti óndirýshiniń bar-joǵy jáne óńirlerdegi qosymsha ústemeaqy áser etedi.
Elimiz boıynsha arzan qant Taldyqorǵan (380 tg/kg bastap), Oral (390 tg/kg bastap) jáne Taraz (410 tg/kg bastap) qalalarynda satylyp jatyr. Ońtústik óńirlerde zaýyt bar jáne saqtandyrý qoryna tikeleı jetkiziledi.
Al eń joǵary baǵa elimizdiń batysynda, sondaı-aq ońtústiginde tirkeldi. Qant baǵasy Atyraý qalasynda qymbat. Kelisi 600 teńgeden bastalady. Shymkent (560 tg/kg deıin), Almaty jáne Aqtóbe (555 tg/kg deıin) qalalarynda da quny joǵary.
Astana men Aqtaý qalalarynda kelisi – 450 teńge. Sonymen birge Qaraǵandy (435–480 tg/kg) jáne Pavlodar (460–500 tg/kg) qalasynda osy shamalas.
Infografıkada kelilep satylatyn qant baǵasy jazýly. Alaıda ózge pishindegi qantty satyp alsa, baǵa áldeqaıda joǵary bolyp shyǵady.
Shaqpaq qant. Qorapqa salynǵan tekshe pishindi qant baǵasy áldeqaıda qymbat bolyp keledi. Qazaqstanda onyń baǵasy qumshekerge qaraǵanda orta eseppen 30-50% joǵary jáne dúken sóresinde kelisi 700-850 teńgege shyǵady.
Quraq qant. Bul ónimdi kóbine qantty almastyrý úshin satyp alady. Azııa jáne Latyn Amerıkasy elderinen ımporttalatyn ónim baǵasy áldeqaıda qymbatqa shyǵady. Almaty jáne Astana qalalaryndaǵy «ekzotıkalyq» qant baǵasynyń kelisi 1 500–2 500 teńge bolyp tur.
Óńirlerde qant baǵasy tasymaldaý quny men jergilikti saýda jelileriniń ustanymyna qaraı ózgerip otyrady. Elimizdiń ońtústiginde zaýyt bar jáne soǵan saı baǵa tómen. Al batys óńirleri qantty ımporttaıdy. Sondyqtan mundaǵy baǵa joǵary.
Buǵan deıin Qazaqstandaǵy tańqýraı men qaraqat baǵasy jazyldy.
