Qazaqstan qalalarynda gúl baǵasy qansha
ASTANA. KAZINFORM – Halyqaralyq áıelder kúni qarsańynda ádettegideı gúlge suranys artady. Bul merekede áıelder qaýymyna kóbine qyzǵaldaq pen raýshan gúlin syılaıdy. Al onyń baǵasy surpy men gúldiń uzyndyǵyna qaraı ártúrli.
Raýshan gúli ár merekede suranysqa ıe. Alaıda onyń baǵasy óńirlerde ártúrli bolyp tur.
Qaraǵandy qalasynda raýshan gúliniń ár danasy orta eseppen 800 teńgeden bastalyp, 1 500 teńgege deıin jetti. Al Jezqazǵan qalasynda baǵa sál joǵary. Raýshan gúliniń túıirin 1 000 – 1 500 teńgege satyp alýǵa bolady. Gollandyq raýshan gúliniń baǵasy Qostanaıda 900 – 1 200 teńge.
Qyzylorda qalasynda tańdaý kóp. Munda baǵa gúldiń surpy men uzyndyǵyna qaraı ózgerip otyrady. Taraz qalasynda uzyndyǵy 80-100 sm ári jergilikti jerde ósirilgen raýshan gúliniń ár danasyn 800 – 1 000 teńgege, al gollandyq gúldi 1 300 – 1 400 teńgege satyp jatyr.
Pavlodar qalasynda baǵa 600 teńgeden bastalǵanymen, keı jerlerde 2 000 teńgege deıin barady. Aqtaý men Taldyqorǵan qalalarynda bir gúldiń baǵasy 700 – 1 000 teńge jáne odan joǵary. Elimizde eń tómen baǵa Qyzylorda (qytaılyq suryp) men Pavlodarda bolyp tur. Munda raýshan gúliniń bir danasy 450 – 600 teńge.
Qyzǵaldaq baǵasy raýshan gúline qaraǵanda turaqty. Óńirler arasynda asa úlken aıyrmashylyq baıqalmaıdy.
Qaraǵandy qalasynda onyń baǵasy 800 – 1 000 teńge bolsa, Jezqazǵan men Qostanaıda qyzǵaldaqty 800 – 1 200 teńgege satyp alýǵa bolady. Al Oralda qyzǵaldaqty 960 teńgege, keı jerlerden 600 – 800 teńgege satyp jatyr.
Elimiz boıynsha qyzǵaldaq baǵasy Pavlodarda tómen. Munda ár danasy 600 – 800 teńge. Aqtaý qalasynda 600 – 900 teńge, Taldyqorǵanda shamamen 700 – 1 000 teńge. Petropavl qalasynda qyzǵaldaq baǵasy 1 000 teńge, al pıon qyzǵaldaǵynyń baǵasy shamamen 1 200 teńge.
Eger aldyn ala tapsyrys berse Kókshetaýda qyzǵaldaqtyń ár danasyn 650 teńgege satyp alýǵa bolady. Al mereke kúnderi gúl baǵasy kóteriledi.
Eger ortasha baǵany salystyrar bolsaq, eń tıimdi baǵa Pavlodar, Aqtaý men Kókshetaýda. Munda qyzǵaldaqty 600 – 650 teńgege satyp jatyr.
Al Petropavl men Jezqazǵan qalasynda qyzǵaldaq baǵasy eń joǵary. Ár danasyn 1 000 - 1 200 teńgege satady.
Qyzylordada raýshan gúliniń surpyna qaraı baǵa bir-birinen tym alshaq. Máselen qytaılyq raýshan gúlin 450 teńgege satyp alýǵa bolsa, gollandyq raýshan baǵasy 3 500 teńge.
Satýshylardyń aıtýynsha, mereke jaqyndaǵan saıyn gúl baǵasy ósip, keıde azdap tómendeýi múmkin. Máselen Tarazda jetkizý artyp, mereke kúni qyzǵaldaq baǵasy 100 teńgege deıin arzandaýy yqtımal.
Elimizdiń kóp óńirinde qyzǵaldaq baǵasy shamamen 600 – 700 teńge, al raýshan gúliniń ortasha baǵasy 800 – 1 500 teńge aralyǵynda.
Buǵan deıin biz Ramazan aýynda qurma baǵasy qansha bolǵanyn jazdyq.