Qazaqstan qalalarynda balyq baǵasy qansha
ASTANA. KAZINFORM – Qazaqstan qalalarynda balǵyn balyq baǵasynyń aıyrmashylyǵy joǵary. Sazan men semga balyǵynyń baǵasy óńirlerge, logıstıkaǵa, suranys pen jetkizý qyzmetine, satý ádisine baılanysty ózgerip otyrady, dep habarlaıdy Kazinform agenttiginiń tilshisi.
Semga balyǵynyń baǵasy elimizdiń astanasynda joǵary bolyp tur. Astanada kelisi 8 500 teńgeden bastalyp, 14 000 teńgege deıin jetedi. Al Almatyda bul balyqtyń kelisi 9 000 – 15 000 teńge aralyǵynda. Shymkent qalasynda baǵa 5 500 teńgeden bastalyp, 12 000 teńgege jetti.
Elimizdiń batysy men ońtústiginde baǵa qoljetimdi. Aqtaýda — 7 000–8 000 teńge, Taraz qalasynda — 6 000–7 500 teńge, al Qyzylordada bul balyqtyń kelisi shamamen — 6 500–8 000 teńge aralyǵynda. Qaraǵandy qalasynda semga baǵasy 6 000–9 000 teńge bolyp tur. Al Petropavlda keı jerde kelisi 9 850 teńgege satylady.
Al sazan baǵasy elimizde qoljetimdi. Eń arzany Qostanaı qalasynda satylady. Munda kelisi – 1 200 teńge. Balyq iri bolsa, baǵasy da soǵan saı ósedi. Aqtóbe qalasynda baǵa 1 500 teńgeden bastalyp, 2 000 teńgege jetti. Al Taldyqorǵanda 1 500 – 3 600 teńge, Túrkistanda 2 500 – 3 000 teńge, Kókshetaýda 2 200–2 500 teńge aralyǵynda.
Semga baǵasy nege joǵary? Sebebi balyqtyń bul túri ımport taýar. Oǵan valıýta baǵamy, logıstıka, saqtaý tártibi men saýda ústemesi áser etedi. Sonymen birge semganyń túrlerine qaraı da baǵa kóterilip tur. Máselen baqtaq nemese albyrt balyq bar. Satyp alar kezde taýar týraly aqparatty muqııat oqyǵan jón.
Sazan balyǵy nege arzan? Sebebi balyqty jergilikti ózen-kólden, sý toǵanynan aýlap alýǵa bolady. Keıbir sharýalar ózderi ósirip, satady. Import taýar bolmaǵan soń logıstıka shyǵyny az, saqtaýǵa da ońtaıly. Bul da baǵaǵa óz áserin tıgizedi.
Semga omega-3 dárýmenine baı. Bul júrek-qan tamyrlary júıesiniń jumysyna, mıǵa oń áserin tıgizedi, qabynýdy basady.
Sazan - dıetalyq taǵamnyń túri ári baǵasy qoljetimdi. Quramynda aqýyz bar, mıneraldarǵa baı.
Dárýmenge baı balyq pen balyq ónimderin aptalyq as mázirine qosyp otyrǵan jón. Semga men sazannyń qaısysy sizge unaıdy ári qaısysyn otbasy bıýdjeti kóteredi, soǵan basa mán berińiz.
Buǵan deıin Qazaqstandaǵy jylqy etiniń baǵasy týraly jazyldy.