Qazaqstan qalalarynda alma men apelsın baǵasy qansha
ASTANA. KAZINFORM – Kóktemde adam aǵzasynda dárýmen azaısa jemis-jıdek jep, qalpyna keltirýge bolady. Alaıda elimizdiń ár turǵyny alma men apelsın satyp ala almaýy múmkin, dep habarlaıdy Kazinform agenttiginiń tilshisi.
Kazinform tilshileri alma men apelsın baǵasyn dál salystyrý úshin bazar men iri sýpermarket ishin aralady. Baǵa jemistiń surpyna, qaı elden ákelingenine baılanysty ózgerip tur. Qazirgi kezde baǵa bazarlarda tómen.
Apelsın baǵasy
Apelsın baǵasy Shymkent qalasynda tómen bolyp tur. Munda tsıtrýstyń kelisi 700 – 1 200 teńge aralyǵynda. Odan ári Qostanaı qalasy jalǵastyrady. Apelsınniń kelisi – 720 – 1 100 teńge. Aqtaýlyqtar bolsa kelisin 800 teńgege de satyp ala alady. Munda apelsındi 750 – 1 400 teńgege saýdalap jatyr.
Odan ári Semeı, Qaraǵandy, Pavlodar, Qyzylorda men Petropavl qalalary tur. Kelisi – 900 teńge. Bul qalalarda keıde apelsın baǵasy 1 150 – 1 500 teńgege deıin jetedi. «S» dárýmenine baı jemis Mysyr, Túrkııa men Qytaıdan tasymaldanady.
Almaty, Atyraý, Aqtóbe men Oralda tsıtrýstyń kelisi 1 000 teńgeden bastalady. Sonyń ishinde ońtústik astana men Oraldaǵy baǵa 1 750 jáne 1 800 teńge bolyp tur. Mundaı baǵaǵa erekshe surpyn, sonyń ishinde qyzyl apelsındi satyp alýǵa bolady.
Óskemen, Kókshetaý men Taraz qalalarynda baǵa 1 100 teńgeden bastalady. Al jaqyn mańda ornalasqan Túrkistan, Taldyqorǵan men Jezqazǵan qalalarynda baǵa 1 200 teńge jáne odan joǵary. Qazirgi kezde tsıtrýs jemistiń baǵasy elimizdiń astanasynda joǵary bolyp tur. Astana qalasynda kelisi – 1 400 – 1 600 teńge.
Alma baǵasy
Elimizde apelsınge qaraǵanda alma surpy kóp. Soǵan saı baǵasy da ózgerip otyrady. Máselen saltanat, golden, fýdjı sekildi túrleri bar.
Apelsın sekildi alma baǵasy da Shymkent qalasynda tómen. Kelisi 400 teńgeden bastalyp 1 280 teńgege deıin jetedi. Odan ári Túrkistan qalasy tur. Munda baǵa 550 – 800 teńge aralyǵynda.
Qostanaı, Semeı men Astana qalalarynda baǵa 600 teńgeden bastalady. Elimizdiń astanasynda almanyń keıbir surpynyń kelisi 1 500 teńgege satylyp jatyr. Al Pavlodar, Atyraý men Óskemende baǵa sál joǵary. Kelisi shamamen 700 teńge bolady.
Aqtóbe, Petropavl, Kókshetaý men Aqtaý qalasynda almanyń eń arzany 750 teńge bolyp tur. Eskere keterligi, alma baǵasy únemi ózgerip otyrady. Baǵa kóbine tasymaldaý kezinde jańaryp turady.
Taraz, Taldyqorǵan men Qaraǵandy qalalarynda almanyń kelisi 800 teńgeden bastalady. Keıbir surpynyń quny 1 500 teńgege deıin jetedi.
Almaty men Qyzylorda qalalarynda temirge baı jemis baǵasy 900 teńge bolsa, Oral men Jezqazǵanda kelisi 1 000 teńgeden bastalady.
Aıta keteıik, buǵan deıin qııar men qyzanaq baǵasy týraly jazyldy. Sonymen birge kólik jýý qyzmetiniń qunyn bildik.
