Qazaqstan qaqtyǵystarǵa májbúrli qatysqan balalardy ońaltýdy usyndy - BUU
BUU-nyń Nıý-Iorktegi Shtab-páterinde ótken jıyn BUU-nyń «Balalar jáne qarýly qaqtyǵystar» atty mandatynyń 20 jyldyǵyna oraı ótkizildi.
BUU-daǵy Qazaqstannyń Turaqty ókili Qaırat Omarov búginde urlanyp jatqan, zorlyq-zombylyqqa ushyraǵan, bilim alý múmkindiginen aıyrylǵan, sondaı-aq qarýly qaqtyǵystarǵa qatysýǵa májbúr bolǵan balalardyń qazirgi ahýalyn jaqsartý boıynsha birqatar naqty sharalar usyndy.
Atap aıtqanda, ol barlyq múddeli taraptardyń, sonyń ishinde aımaqtyq jáne halyqaralyq quqyq qorǵaý uıymdarynyń birlesken jumysynyń tıimdiligin arttyrýdyń mańyzdylyǵyna toqtaldy.
Sonymen qatar Qaırat Omarov BUU-nyń qaqtyǵysýshy taraptarmen jasaǵan is-qımyl josparynyń oryndalýyn qamtamasyz etýdiń budan da qatal sharalaryn qabyldaýǵa úndedi.
QR elshisi Qazaqstan Prezıdenti Nursultan Nazarbaevtyń halyqaralyq lańkestik jáne ozbyr ekstremızmmen kúresýge arnalǵan bastamalaryna da kóńil aýdartty. Oǵan qosa, bilim berýge, balalardy ońaltýǵa jáne áleýmettik ortaǵa qaıta qosýǵa tartylatyn ınvestıtsııalardyń kólemin arttyrýǵa erekshe mán berýdi usyndy.
Aıta ketý kerek, Qazaqstan bala quqyqtaryn qorǵaý salasyndaǵy halyqaralyq mindettemelerdiń oryndalýyna kóp mańyz berip keledi jáne 2017-2018 jyldary BUU Qaýipsizdik keńesiniń turaqty emes múshesi retinde qarýly qaqtyǵystardaǵy balalardyń qaýipsizdigin qamtamasyz etý boıynsha maqsatty jumys atqarýdy josparlaýda.
Aıta keteıik, sharaǵa BUU Bas Assambleıasynyń 71-sessııasynyń tóraǵasy Pıter Tompson, BUU-nyń qarýly qaqtyǵystardaǵy balalar máseleleri boıynsha arnaıy ókili Leıla Zerrýgı, ıÝNISEF basshysy Entonı Leık, BUU Bas hatshysynyń kómekshileri Mıroslav Encha (saıası máseleler jónindegi) men El Gasım Ýeın (bitimgerlik operatsııalar jónindegi), BUU-ǵa múshe elderdiń turaqty ókilderi, halyqaralyq gýmanıtarlyq jáne quqyq qorǵaý uıymdarynyń basshylary men ózge de resmı tulǵalar qatysty.
