Qazaqstan qaqtyǵysty tek dıplomatııalyq amaldarmen retteýge bolady dep esepteıdi – Toqaev Reseı-Ýkraına qaqtyǵysy týraly
ASTANA. KAZINFORM - Pákistannyń The News International gazetine suhbat bergen Memleket basshysy Qasym-Jomart Toqaev Reseı-Ýkraına qaqtyǵysyna qatysty paıymyn aıtty.
- Rasynda, jaǵdaı asa kúrdeli. Bul jerdegi eń basty másele – terrıtorııalyq talas ekenin túsinemiz. Qazaqstan qaqtyǵysty tek saıası, dıplomatııalyq amaldarmen retteýge bolady dep esepteıdi. Qazirgi jaǵdaıda beıbitshilikke qol jetkizýdiń jalǵyz joly – qaqtyǵysqa qatysýshy taraptardy kelissózge kelistirý. Buǵan kámil senemiz. Qazaqstan araaǵaıyn rólin atqarýǵa umtylmaıdy. Alaıda elimiz kelissózderge beıtarap alań usynyp, jan-jaqty kómektesýge daıyn, - dedi Memleket basshysy.
Sonymen qatar Qasym-Jomart Toqaev Gaza sektorynda beıbitshilik ornatý josparyna qatysty pikir bildirdi.
- Arnaıy ókilder Stıv Ýıtkoff pen Djared Kýshner usynǵan jospar jaqsy oılastyrylǵan. Menińshe, bul asa órshil bastama bolǵanymen, ony oryndaýǵa ábden bolady. Jospardyń keıbir aspektileri beıbitshilik pen ósip-órkendeýge berik negiz qalaıtyn damý jobasyna uqsaıdy. Alaıda, qos halyqqa arnalǵan eki memleket qurýǵa saıası erik-jiger bolmasa, qandaı da bir jospardyń túbegeıli iske asa qoıýy neǵaıbyl. Tolassyz qantógisti toqtatyp, qalypty ómirge oralýǵa tek osyndaı sheshim ǵana túrtki bola alady, - dedi Memleket basshysy.
Budan buryn habarlanǵandaı, Prezıdent Qasym-Jomart Toqaev Pákistanǵa memlekettik saparmen bardy.
