Qazaqstan qaqtyǵys aımaqtarynan oralǵan azamattardy ońaltý jáne qoǵamǵa qaıta beıimdeý tájirıbesin usyndy

ASTANA. KAZINFORM - Qazaqstan Respýblıkasy Syrtqy ister mınıstrliginiń Erekshe tapsyrmalar jónindegi elshisi Erlan Álimbaev Eýropadaǵy qaýipsizdik jáne yntymaqtastyq jónindegi uıymnyń (EQYU) Astanadaǵy Baǵdarlamalar ofısiniń uıymdastyrýymen ótken qaqtyǵys aımaqtarynan oralǵan azamattardy ońaltý jáne qaıta ıntegratsııalaý jónindegi Qazaqstannyń kúsh-jigerine arnalǵan brıfıngte baıandama jasady.

Kazahstan predlojıl sozdat rabochýıý grýppý s OBSE po zaşıte grajdan, postradavshıh v zonah konflıktov
Foto: QR SІM

QR Syrtqy ister mınıstrligi baspasóz qyzmetiniń habarlaýynsha, is-sharaǵa EQYU-nyń Astanadaǵy Baǵdarlamalar ofısiniń basshysy, Elshi Alekseı Rogov, Qazaqstan Respýblıkasy Іshki ister mınıstrliginiń, Ulttyq adam quqyqtary ortalyǵynyń, dıplomatııalyq korpýs pen halyqaralyq uıymdardyń, sondaı-aq úkimettik emes uıymdardyń ókilderi qatysty.

Brıfıng barysynda Erlan Álimbaev Qazaqstannyń 2019–2021 jyldary Sırııa men Iraktan azamattardy qaıtarý boıynsha júzege asyrylǵan «Jýsan» jáne «Rýsafa» gýmanıtarlyq operatsııalarynyń tájirıbesimen bólisti. Nátıjesinde elimizge barlyǵy 756 azamat, onyń ishinde 191 áıel, 528 bala jáne 37 er adam qaıtaryldy.

Qazaqstandyq dıplomat oralǵan azamattardy ońaltý jáne qoǵamǵa qaıta beıimdeý baǵytynda atqarylyp jatqan keshendi jumystardyń barysymen tanystyryp, medıtsınalyq jáne psıhologııalyq kómek kórsetý, balalardyń bilim alýyn qamtamasyz etý, otbasylardy áleýmettik qoldaý, sondaı-aq árbir otbasyǵa jeke tásil qoldanýdyń mańyzdylyǵyn atap ótti. 2026 jyly «Jaıyq Juldyzy» qoǵamdyq qory ulttyq seriktestermen birlesip, TurKIDstan jáne PathMakers Burabay baǵdarlamalar sheńberinde balalar men jasóspirimder úshin Túrkistan oblysy, Astana, Shymkent jáne Býrabaı qalalarynda mádenı-tanymdyq jáne bilim berý is-sharalaryn uıymdastyrdy. Bul balalardyń ózine degen senimin arttyrýǵa, dostyq qarym-qatynastar ornatýǵa jáne qoǵamnyń bir bólshegi ekenin sezinýge septigin tıgizdi.

Erlan Álimbaev halyqaralyq áriptestermen yntymaqtastyqty odan ári nyǵaıtýdyń mańyzdylyǵyn atap ótip, «Ortalyq Azııa + EQYU» formatynda óńirlik jumys tobyn qurýdy usyndy. Atalǵan bastama aqparat almasýǵa, zardap shekken azamattardy erte anyqtaý men qorǵaýǵa, mamandardy birlesip daıarlaýǵa jáne transshekaralyq jaǵdaılar boıynsha is-qımyldardy úılestirýge baǵyttalǵan.

Osylaısha, Qazaqstan EQYU-men, Eýropa Keńesimen jáne basqa da halyqaralyq áriptestermen adam saýdasyna, zorlyq-zombylyq ekstremızmine jáne transulttyq qylmysqa qarsy is-qımyl, sondaı-aq zardap shekken azamattardy qorǵaý salalaryndaǵy yntymaqtastyqty odan ári damytýǵa daıyn ekenin rastady.

Osyǵan deıin «Jýsan» operatsııasy boıynsha oralǵan 572 balany ońaltý tájirıbesi talqylandy.