Qazaqstan KADEX-te jańa býyndaǵy brondy mashınalardy kórsetedi
«Kásiporyn «Barys» brondy mashınasynyń 6h6 jáne 8h8 dóńgelekti formýlasyndaǵy úlgilerin, sonymen qatar 4h4 dóńgelekti formýlasyndaǵy «Arlan» jáne «Alan» bronevıkterin kórsetedi. Eger «Barys 8h8» aldyńǵy «KADEX-2016» kórmesinde reseılik «AÝ-220M» jaýyngerlik modýline ornalasqan 57-mm avtomatty zeńbiregimen kórsetilse, osy jyly BDM otandyq óndirýshi «KAE» JShS áskerı modýlimen kórmege qoıylady. Eki jyldyq zaýyttyq jáne kórsetilimdik synaqtardyń nátıjesinde «Barys 8h8» birqatar konstrýktorlyq, tehnıkalyq jáne taktıkalyq ózgeristerden ótti», - dep atap ótilgen QR Qorǵanys jáne aeroǵarysh ónerkásibi mınıstrligi málimetinde.
«Barys 6h6» eki jyl boıyna ótken tájirıbelik-konstrýktorlyq jumystardan keıin 82-A BTR-iniń turaqtandyrylǵan zeńbirekti-pýlemettik qarý-jaraǵymen sáıkestendirilgen jaýyngerlik bólimshesimen kórsetiledi. Kórmeniń qonaqtary eń tanymal qazaqstandyq brondy mashına «Arlandy» ártúrli úlgide, mysaly: «SARP» jaýyngerlik modýlimen, qosarlanǵan 7,62 mm PKT pýlemeti ornatylǵan «SARP-S» jetildirilgen jaýyngerlik modýlimen jáne barlaý qondyrǵysymen kóre alady.
«Kásiporyn alǵash ret kórmede kópmaqsatqa arnalǵan «Alan» BDM kórsetpek. Mashına ártúrli mindetti atqarýǵa, máselen: quqyqtyq tártipti saqtaý, arnaıy jasaq jáne aıryqsha áreket etý tobynyń operatsııasyna, ishki qaýipsizdikke, shekarany sholǵyndaýǵa jáne qarýly qaqtyǵysty joıýǵa arnalǵan», - dep naqtylanǵan mınıstrlik málimetinde.
«Qazaqstan Paramaýnt Injınırıng» JShS Ortalyq Azııadaǵy otandyq biregeı jáne ınnovatsııalyq kásiporyn bolyp tabylady. Zaýytta shyǵarylatyn brondy mashınalar eń joǵarǵy halyqaralyq standarttarǵa saı jáne óziniń keıbir taktıkalyq-tehnıkalyq kórsetkishteri jaǵynan sheteldik analogtardan asyp túsedi. Qazaqstandyq brondy mashınalardyń erekshelikteri - olardyń senimdiliginde, mobıldiliginde jáne myqty qorǵanysynda.
Kásiporyn «Arlan» BDM jáne «Alan» BDM-di Qazaqstan Respýblıkasy Qorǵanys mınıstrligine jáne basqa da áleýetti mekemelerge jetkizý týraly memlekettik tapsyrysty tabysty oryndaýda.
Aıta ketý kerek, qazaqstandyq armııany qarýlandyrýǵa qabyldanǵan «Arlan» brondy dóńgelekti mashınalary kórme kezinde tehnoalańda ótetin kórsetilimderge qatysady.
