Qazaqstan qabyldap jatqan sharalar BUU Sybaılas jemqorlyqqa qarsy konventsııasynyń usynymdaryna sáıkes keledi

NUR-SULTAN. QazAqparat – Búgin, 9 sáýirde BUU-nyń Ortalyq Azııadaǵy Esirtki jáne qylmys jónindegi basqarmasynyń (budan ári - EQB) Turaqty ókili Ashıta Mıttal hanymnyń bastamasymen Sybaılas jemqorlyqqa qarsy is-qımyl agenttiginiń tóraǵasy Alık Shpekbaevpen onlaın kezdesý ótti, dep habarlaıdy QazAqparat.

Áńgimelesý barysynda taraptar pikir almasyp, birlesken qyzmettiń odan arǵy qadamdaryn talqylady.

Sybaılas jemqorlyqqa qarsy vedomstvo basshysy elimizde júrgizilip jatqan keshendi reformalarǵa nazar aýdaryp, saıası jańǵyrtýdyń mańyzdylyǵyn, sondaı-aq halyqaralyq standarttar prızmasy arqyly iske asyrylǵan jáne josparlanǵan zańnamalyq bastamalardy atap ótti.

Alık Shpekbaev sybaılas jemqorlyqqa qarsy strategııany iske asyrý barysy týraly habarlady. Spıker 6 baǵytty egjeı-tegjeıli túsindirdi: memlekettik organdardyń transparenttiligi men ashyqtyǵyn arttyrý, onyń ishinde memlekettik qyzmetterdi tsıfrlandyrýdy eskere otyryp; sybaılas jemqorlyqtyń sebepteri men mán-jaılaryn joıý; memlekettik qyzmetshilerdiń etıkalyq minez-qulqyn nyǵaıtý; sybaılas jemqorlyqqa qarsy aǵartý; azamattyq qoǵamdy tartý jáne jazanyń bultartpaý qaǵıdatyna negizdelgen qylmystyq-quqyqtyq sharalar.

Sheteldik áriptester Agenttiktiń qyzmetine joǵary baǵa berdi. Ashıta Mıttal hanym: «Qazaqstannyń BUU EQB bastamalaryn jáne BUU-nyń Sybaılas jemqorlyqqa qarsy konventsııasyna sholý tetigin iske asyrýda kórsetken qoldaýy úshin alǵysymyzdy bildiremiz. Biz Ortalyq Azııa men Kavkaz óńirinde baǵdar bolýy tıis Sybaılas jemqorlyqqa qarsy vedomstvo jumysynyń oń nátıjelerin kórip otyrmyz. Sizderge BUU Bas Assambleıasynyń Nıý-Iork, AQSh-taǵy sybaılas jemqorlyqqa qarsy kúres jónindegi arnaıy sessııasy aıasynda qazaqstandyq tájirıbeni tanystyrýdy usynamyz», - dep atap ótti.

Venadaǵy BUU EQB Shtab-páteriniń ókili, Avstrııa Vendı O' Braıen hanym da birlesken kúsh-jigerdi odan ári nyǵaıtýǵa úmit bildirdi. Suhbattasýshy: «Biz agenttiktiń quqyq qorǵaý organdaryn reformalaýǵa qosqan úlesin baǵalaımyz. Atap aıtqanda, servıstik polıtsııany qalyptastyrý, ashyqtyqty arttyrý jáne ishki ister organdaryndaǵy qatarlardyń tazalyǵyn qamtamasyz etý boıynsha júrgizilip jatqan jumystar týraly sóz etip otyrmyz. Agenttikpen jumys BUU EQB jáne ІІM jańa jobasy aıasynda óte ózekti», - dedi ol.

Ortalyq Azııadaǵy BUU EQB Halyqaralyq baǵdarlamalar menedjeri Kýn Makverıngtiń aıtýynsha, Qazaqstannyń memlekettik qyzmetterdi tsıfrlandyrý boıynsha júrgizgen, ashyqtyqty arttyratyn jáne turmystyq sybaılas jemqorlyqty tómendetetin jumysy tańǵalarlyq. «Biz azamattyq qoǵam men bıznes-sektordy sybaılas jemqorlyqtyń aldyn alý máselelerine tartýdy da erekshe atap ótemiz», - deıdi menedjer.

Taraptar ózara qoldaý kórsetýge daıyn ekendikterin bildire otyryp, joǵaryda kórsetilgen baǵyttarda ózara is-qımyldy nyǵaıtýǵa kelisti. Taıaýda óńirdegi ozyq tájirıbeler boıynsha saraptamalyq jumys toby qurylady.