Qazaqstan Kabýlda saýda úıin ashty
ASTANA.KAZINFORM — QR Premer-Mınıstriniń orynbasary — Ulttyq ekonomıka mınıstri Serik Jumanǵarın bastaǵan qazaqstandyq delegatsııanyń bıznes-mıssııasy aıasynda Kazaqstannyń Kabýl qalasynda Saýda úıi ashyldy.
Aıta ketý kerek, Qazaqstannyń alǵashqy saýda úıi 2024 jyly Gerat qalasynda ashylǵan. Alǵashqy Saýda úıi tabysty iske qosylǵannan keıin Qazaqstan Aýǵanstanmen saýda baılanysyn keńeıtýdi kózdep, el astanasynda negizgi saýda úıin ashty.
Saltanatty ashylý rásimine «QazTrade» AQ Bas dırektory Aıtmuhamed Aldajarov pen Afghan German Bakhtar (AGB) kompanııasynyń Bas dırektory Sultan Ahmad Sarýarı qatysty. Joba aýǵandyq seriktespen birlesip júzege asyrylyp otyr. Bul jergilikti bıznes qaýymdastyqpen jáne memlekettik organdarmen tıimdi ózara is-qımyldy qamtamasyz etip, qazaqstandyq eksporttaýshylar úshin qolaıly jaǵdaı jasaýǵa múmkindik beredi.
Kabýldaǵy Saýda úıi Qazaqstannyń negizgi eksporttyq baǵyttaryn tanystyratyn turaqty kórme-saýda alańy bolady. Onyń bazasynda azyq-túlik pen kúndelikti tutyný taýarlaryn kórsetý jáne satý aımaǵy, qazaqstandyq óndiristegi avtokólikterdiń kórme zaly, sondaı-aq dárilik zattar men medıtsınalyq ónimderdi saqtaý jáne taratýǵa arnalǵan farmatsevtıkalyq qoıma jumys isteıdi.
— Kabýldaǵy Saýda úıiniń ashylýy Qazaqstan men Aýǵanstan arasyndaǵy ekonomıkalyq áriptestikti nyǵaıtý jolyndaǵy kezekti praktıkalyq qadam. Biz otandyq ónimderdi ilgeriletýge, jańa seriktester tabýǵa jáne birlesken jobalardy júzege asyrýǵa arnalǵan turaqty alań qalyptastyryp otyrmyz. Bul ortaq taýar aınalymyn arttyrýdyń jáne ózara tıimdi yntymaqtastyqty damytýdyń mańyzdy quralyna aınalady dep senemiz, — dedi «QazTrade» AQ Bas dırektory Aıtmuhamed Aldajarov.
Kabýldaǵy Qazaqstan Saýda úıiniń ashylýy aıasynda «ShalqııaTsınk LTD» AQ men Afghan German Bakhtar Company arasynda myrysh kenin jetkizý týraly kelisimshartqa qol qoıyldy. Kelisimshart DAP sharttary boıynsha jylyna shamamen 30 myń tonna myrysh kenin jetkizýdi kózdeıdi. Kelisimniń negizgi maqsaty — «Qazmyrysh» kásiporyndaryn qajetti shıkizatpen qamtamasyz etý. Kelisimsharttyń jalpy somasy 18,88 mln AQSh dollar.
Sondaı-aq avtomobıl ónerkásibi salasyndaǵy yntymaqtastyqty damytýǵa erekshe nazar aýdarylýda. Saýda úıi alańynda Qazaqstanda qurastyrylǵan, aýǵan naryǵynda suranysqa ıe avtokólikter usynylady. Aldaǵy ýaqytta servıstik qyzmet kórsetý men tehnıkalyq qoldaý júıesin iske qosý josparlanýda. Bul óńirde otandyq avtokólik ónerkásibin ilgeriletýge arnalǵan tolyqqandy ınfraqurylym qalyptastyrýǵa múmkindik beredi.
Taǵy bir perspektıvaly baǵyt — qazaqstandyq farmatsevtıkalyq ónimderdi jetkizýdi damytý. Kabýlda mamandandyrylǵan qoımanyń ashylýy dárilik zattardy júıeli túrde taratýǵa jaǵdaı jasap, otandyq óndirýshilerdiń aýǵan naryǵyndaǵy qatysýyn keńeıtedi.
— Búginde Aýǵanstan — úlken múmkindikter naryǵy. El halqynyń sany 40 mıllıonnan asady, al ekonomıkasy turaqty ósim kórsetip otyr. Buryn Qazaqstan eksportynyń negizin un, astyq, kúnbaǵys maıy jáne agroónerkásiptik keshenniń ózge de ónimderi qurasa, qazir yntymaqtastyqtyń jańa baǵyttary ashylýda. Aýǵan naryǵynda aýyl sharýashylyǵy, qurylys jáne taý-ken ónerkásibine arnalǵan tehnıka, jabdyqtar men servıstik qyzmetterge suranys joǵary. Biz Qazaqstannyń shıkizattyq emes eksportyn ulǵaıtý úshin zor áleýet kórip otyrmyz jáne Kabýldaǵy Saýda úıi jańa jobalardy damytýǵa arnalǵan tıimdi alańǵa aınalady dep senemiz, — dedi GWM Capital LTD dırektorlar keńesiniń tóraǵasy Qanat Qudaıbergen.
Aıta ketelik Qazaqstan men Aýǵanstan óńirlik saýda jáne ınvestıtsııalyq yntymaqtastyqty keńeıtetini týraly jazǵan edik.
