Qazaqstan Izraılge 500 myń tonnaǵa deıin bıdaı jetkizýge daıyn
ASTANA. KAZINFORM — Qazaqstandyq astyq Izraıl naryǵyna jol tartýy múmkin. Azyq-túlik kelisimshart korporatsııasy Izraılge 500 myń tonnaǵa deıin azyq-túlik bıdaıyn jetkizýge daıyn, dep habarlaıdy AShM baspasóz qyzmeti.
Ierýsalım qalasynda ótken Saýda-ekonomıkalyq yntymaqtastyq jónindegi Qazaqstan-Izraıl úkimetaralyq komıssııasynyń onynshy otyrysynda eki el arasyndaǵy aýyl sharýashylyǵy ónimderiniń ózara saýda kólemin arttyrý jáne ozyq tehnologııalardy óndiriske engizý máseleleri talqylandy.
Qazaqstannyń agroónerkásiptik kesheniniń áleýeti men otandyq ónimniń eksporttyq múmkindikteri týraly «Azyq-túlik kelisimshart korporatsııasy» UQ Basqarma tóraǵasynyń orynbasary Samat Teńbaev baıandady.
Qazaqstan álemdik agrarlyq naryqtaǵy ornyn nyǵaıtyp, otandyq aýyl sharýashylyǵy ónimderin shetelge jetkizý aıasyn jyldan-jylǵa keńeıtip keledi. Qazirgi tańda elimizdiń aýyl sharýashylyǵy ónimderi álemniń 80-nen astam eline eksporttalady. Ásirese Eýropa, Soltústik Afrıka, Taıaý Shyǵys jáne Ońtústik-Shyǵys Azııa memleketterimen saýda baılanystaryn damytýǵa basymdyq berilip otyr.
Bıylǵy mol astyq ónimi eksport kólemin arttyrýǵa mol múmkindik týǵyzyp otyr. Qazaqstanda aqýyz ben jelimtik mólsheri joǵary, álemdik naryqta suranysqa ıe azyq-túlik bıdaıynyń mol qory bar. Bul ónim Izraıldegi astyq óńdeý kásiporyndarynyń da suranysyn qanaǵattandyra alady.
— Izraıl naryǵynyń suranysy men qajettiligin eskere otyryp, 200 myńnan 500 myń tonnaǵa deıin azyq-túlik bıdaıyn jáne ózge de aýyl sharýashylyǵy ónimderin jetkizý jóninde uzaq merzimdi kelisimsharttar jasasýǵa daıynbyz, — dedi Samat Teńbaev.
Eksport kólemin ulǵaıtý jolyndaǵy mańyzdy máselelerdiń biri — ónimdi tasymaldaý. Osyǵan baılanysty qazaqstandyq taýarlardy Izraılge jetkizý úshin Ázerbaıjan men Grýzııa arqyly ótetin kólik dálizin, sondaı-aq Baltyq teńizindegi porttar arqyly ótetin balama baǵyttardy paıdalaný usynyldy.
Eki el arasyndaǵy yqpaldastyqty keńeıtýge jyl saıyn 2 mln tonnadan astam bıdaı satyp alatyn Izraıl eliniń astyqqa degen joǵary suranysy da negiz bolyp otyr. Sondaı-aq maıly daqyldarǵa, arpa men júgerige suranys turaqty. Munyń bári Qazaqstannyń aýyl sharýashylyǵy ónimderin shetelge satý baǵyttaryn ártaraptandyrýǵa jáne eki el arasyndaǵy saýda-ekonomıkalyq baılanysty nyǵaıtýǵa tyń múmkindik beredi.
Qazaqstan eksportty arttyrýmen qatar, otandyq agroónerkásiptik keshendi jańǵyrtý maqsatynda Izraıldiń ozyq tehnologııalaryn ıgerýge de múddeli. Ásirese sý qory tapshy jaǵdaıda aýyl sharýashylyǵyn tıimdi uıymdastyrý jónindegi Izraıl tájirıbesi aıryqsha mańyzǵa ıe.
Bul rette sýdy únemdeıtin sýarý júıelerin engizý, tazartylǵan sarqyndy sýdy qaıta paıdalaný, óndiris úderisterin tsıfrlandyrý jáne aýyl sharýashylyǵyn basqarýda jasandy ıntellekt múmkindikterin qoldaný basym baǵyttar sanalady.
Atalǵan tehnologııalardy Qazaqstannyń tabıǵı-klımattyq erekshelikterine beıimdeý sý resýrstaryn tıimdi paıdalanýǵa, óndiris shyǵyndaryn azaıtýǵa jáne aýyl sharýashylyǵy salasynyń ónimdiligin arttyrýǵa jol ashady.
Osyǵan deıin Qazaqstan Kambodjaǵa bıdaı men et eksporttaýdy kózdep otyrǵanyn jazdyq.
