Qazaqstan Izraıl naryǵyna $360,7 mln kóleminde 70 túrli taýar jetkizýge daıyn
Qazaqstan tarapynan úkimetaralyq komıssııanyń (ÚAK) teń tóraǵalary Qazaqstan Respýblıkasy Premer-Mınıstriniń orynbasary – Saýda jáne ıntegratsııa mınıstri Baqyt Sultanov, Izraıl tarapynan – Izraıl memleketiniń Týrızm mınıstri Ioel Razvozov bolyp tabylady.
Otyrysqa Komıssııa músheleri jáne eki eldiń mınıstrlikteri men vedomstvolarynyń ókilderi qatysty.
Taraptar saýda-ekonomıkalyq yntymaqtastyq, densaýlyq saqtaý, aýyl sharýashylyǵy, jańartylatyn energetıka jáne sý resýrstary, týrızm jáne t.b. salalardaǵy ózara is-qımyl máselelerin talqylady.
Otyrys barysynda Baqyt Sultanov Izraıl elimizdiń mańyzdy saýda seriktesteriniń biri ekenin, sondaı-aq Qazaqstan ekijaqty saýdany damytýǵa jáne ártaraptandyrýǵa basa mán beretinin atap ótti. Bıyl elder dıplomatııalyq qatynastardyń ornaǵanyna 30 jyl tolýyn atap ótýde.
«Bizdiń esepteýlerimiz boıynsha bolashaqta qazaqstandyq kompanııalar Izraıl naryǵyna $360,7 mln kóleminde túrli salalardyń 70 óńdelgen taýaryn, metallýrgııa, tamaq, mashına jasaý, hımııa, sondaı-aq kólik quraldary men qurylys taýaryn jetkizýge daıyn», — dedi Baqyt Sultanov.
Aıta keteıik, Qazaqstan men Izraıl arasyndaǵy taýar aınalymynyń kólemi 2022 jylǵy qańtar-naýryzda $201,3 mln-dy qurap, 2021 jyldyń sáıkes kezeńimen salystyrǵanda 4,1 ese artty ($48,9 mln).
Sondaı-aq, ızraıldik rıteılerler tarapynan qazaqstandyq tamaq ónimderine, atap aıtqanda, kondıterlik ónimderge degen qyzyǵýshylyq artty. Sonymen qatar ızraıldik kompanııalar ımporttalatyn taýarlar jelisin keńeıtýge daıyn jáne qazir qazaqstandyq makaron ónimderi men salqyndatylǵan sýsyndardy iri ızraıldik sýpermarketterdiń sórelerine jetkizýdi uıymdastyrý máseleleri pysyqtalyp jatyr.
Otyrys barysynda Baqyt Sultanov ızraıldik ınvestorlardy «Qorǵas» shekara mańy yntymaqtastyǵy halyqaralyq ortalyǵynyń aýmaǵyndaǵy birlesken jobalarǵa belsendi ınvestıtsııa salýǵa shaqyrdy. Bul Izraıl bıznesiniń Eýrazııalyq ekonomıkalyq odaqtyń tutyný naryqtaryna qoljetimdiligin jeńildetedi.
«Qorǵas» ShYHO – bul Qazaqstan men Qytaı shekarasyndaǵy biregeı transshekaralyq aımaq bolyp tabylatyn ekonomıkalyq, óndiristik, týrıstik jáne mádenı yntymaqtastyq kesheni. Osyǵan baılanysty biz qaıta óńdeý qýattaryn, ónerkásiptik kooperatsııany jáne jahandyq jetkizý tizbegin damytýǵa basa nazar aýdara otyryp, «Qorǵas» ShYHO-nyń odan ári qyzmet etý tásilderin qaıta qaraıtynymyzdy atap ótkim keledi. Biz Izraıldiń memlekettik qurylymdary men bıznesine osy aımaq sheńberindegi yntymaqtastyq úshin barlyq múmkindikterdi egjeı-tegjeıli zerdeleýdi usynamyz», — dedi vıtse-premer.
Komıssııa jumysy aıaqtalǵannan keıin taraptar onyń qorytyndylaryna qanaǵattanatyndyqtaryn bildirip, Komıssııanyń onynshy otyrysyn Ierýsalımde ótkizý týraly ýaǵdalasty. Onynshy kezdesýdi ótkizý kúnderi dıplomatııalyq arnalar arqyly kelisiletin bolady.
Foto: primeminister.kz
