Qazaqstan Izraıl, Qytaı, Ońtústik Koreıaǵa aýyl sharýashylyǵy ónimderin eksporttamaq
«Agroónerkásip salasyn damytý baǵdarlamasyn iske asyrý aıasynda óńirden aýyl sharýashylyǵy óniminiń eksportyn 2022 jylǵa deıin kem degende 2,5 ese arttyrý mindeti tur. Osyǵan oraı veterınarlyq jáne fıtosanıtarlyq qaýipsizdik talaptarynyń saqtalýyn qamtamasyz etý qajet», - dedi Úkimet basshysy.
Osy rette Asqar Mamın 2017 jyly Qazaqstannyń barlyq óńiri aýsyldan taza aımaq mártebesin alǵanyn eske saldy.
«Osynyń arqasynda Iran, Arab Ámirlikterine, Saýd Arabııasyna mal sharýashylyǵy ónimderin eksporttaýǵa shekteýler alyndy. Tısti sharttar kelisildi. Qazirgi tańda Izraıl, Qytaı, Ońtústik Koreıa jáne basqa da eldermen osy baǵyttta kelissózder júrgizilýde», - dedi ol.
Úkimet basshysynyń aıtýynsha, aǵymdaǵy jylǵy naýryzda Qazaqstannyń fıtosanıtarlyq qyzmeti 30 myń kásiporyndy tekserip, olar Qytaıǵa bıdaı ónimin eksporttaýshylar tizimine engizildi.
«Veterınarlyq jáne fıtosanıtarlyq kedergilerdi alý jáne ótkizý naryqtaryn keńeıtý boıynsha jumysty jalǵastyrý qajet. Qazaqstannyń joǵary sapaly jáne ekologııalyq taza ónimmen qamtamasyz etetin senimdi kózge aınalýǵa barlyq áleýeti bar dep aıtýǵa bolady», - dedi Asqar Mamın.
Osyǵan oraı Asqar Mamın Aýyl sharýashylyǵy mınıstrligine ákimdiktermen birge birqatar máselege erekshe nazar aýdaryp, naqty sharalardy qolǵa alýy kerektigin eskertti.
«Birinshiden - turaqty epızootııalyq ahýaldy qamtamasyz etý, mal qorymy oryndaryn veterınarlyq-sanıtarlyq talaptarǵa sáıkestendirý, egis alqaptaryn zııankesterge qarsy óńdeý sharalaryn ýaqytyly qabyldaý, tıimdi veterınarlyq jáne fıtosanıtarlyq baqylaýdy qamtamasyz etý. Bul rette, Eýrazııalyq ekonomıkalyq odaq memleketterimen ózara saýdaǵa qatysty jasalǵan kelisimder aıasynda tıisti rásimderdi júrgizý qajet. Atalyp ótken is-sharalar ónerkásip salasyn damytý baǵdarlamasynda qarastyrylǵan jáne olardy qamtamasyz etý kerek», - dedi ol.
