Qazaqstan ITB Berlin 2026 kórmesine ne usyndy
ASTANA. KAZINFORM - Qazaqstan Germanııada ótip jatqan ITB Berlin halyqaralyq týrıstik kórmesine qatysyp jatyr. Atalǵan kórmege jyl saıyn álemniń 180 elinen 10 000-nan astam eksponent pen 160 000-ǵa jýyq kelýshi jınalady. Sonymen qatar is-sharaǵa 113 500-den astam týrızm salasynyń mamandary qatysady.
QR Týrızm jáne sport mınıstrligi Týrızm ındýstrııasy komıteti baspasóz qyzmetiniń habarlaýynsha, Qazaqstannyń ulttyq pavılonyn Germanııa Federatıvtik Respýblıkasyndaǵy QR Tótenshe jáne Ókiletti Elshisi Nurlan Ońjanov ashty.
Ashylý rásiminde Elshi Qazaqstanǵa degen sheteldik týrısterdiń qyzyǵýshylyǵy aıtarlyqtaı artqanyn atap ótip, týrızmniń halyqaralyq áriptestikti nyǵaıtýdaǵy, mádenı baılanystardy keńeıtýdegi jáne el ekonomıkasyn damytýdaǵy mańyzdy róline toqtaldy.
Ulttyq pavılondy Qazaqstan Respýblıkasy Týrızm jáne sport mınıstrligi uıymdastyrdy. Ekspozıtsııa quramynda 21 kelý týroperatory, qonaqúı bıznesiniń ókilderi, qazaq ulttyq taǵamdaryn usynatyn meıramhanalar, sondaı-aq elimizdiń alty óńiriniń týrıstik múmkindikteri tanystyryldy.
Gastronomııalyq baǵyt aıasynda Sandyq Group kompanııasy ulttyq parkterdegi jobalardy qosa alǵanda, gastrotýrızm salasyndaǵy bastamalaryn usyndy.
Qazaqstan ITB Berlin kórmesine 1996 jyldan beri qatysyp keledi. 2020 jyldy qospaǵanda, 29 jyl boıy ulttyq ekspozıtsııasyn turaqty túrde usynyp otyr.
2025 jyly Qazaqstanǵa Germanııadan 95 myńnan astam týrıst kelgen. Bul elimizdiń eýropalyq naryqtaǵy pozıtsııasynyń nyǵaıyp kele jatqanyn jáne kelý týrızminiń kórsetkishteri turaqty ósim kórsetip otyrǵanyn aıǵaqtaıdy.
ITB Berlin 2026 kórmesine qatysýdyń negizgi nátıjeleri mynalar bolmaq:
1.Qazaqstannyń týrıstik brendi tanymaldyǵyn arttyrý;
2.Germanııa jáne ózge elderden keletin týrıster sanyn kóbeıtý;
3.týrıstik aǵyndy ulǵaıtý jáne sala tabysyn arttyrý;
4.sheteldik týroperatorlarmen jáne halyqaralyq uıymdarmen naqty kelisimder jasaý.
Kórmege qatysý – Qazaqstannyń týrıstik áleýetin jahandyq deńgeıde ilgeriletýge, halyqaralyq baılanystardy keńeıtýge jáne eldi sapaly demalys pen iskerlik saparlar úshin tartymdy baǵyt retinde ornyqtyrýǵa baǵyttalǵan júıeli jumystyń mańyzdy bóligi.
Osyǵan deıin Germanııanyń iri týrızm qaýymdastyǵy Qazaqstanda forým ótkizetini týraly habarladyq.