Qazaqstan Italııaǵa metall buıymdary eksportyn 6 ese arttyrdy

ASTANA. KAZINFORM — Qazaqstan Italııaǵa metall buıymdary eksportyn 6 ese arttyrdy. Bul týraly Saýda jáne ıntegratsııa mınıstri Arman Shaqqalıev aıtty. 

— 6 aıdyń qorytyndysy boıynsha taýar aınalymynda shıkizat eksportyn alar bolsaq, Italııa birinshi, al shıkizat emes taýralar eksportynda úshinshi orynda tur. Bizdiń maqsatymyz tek qana saýda-sattyq emes. Investıtsııalyq jaǵynan Italııanyń iri óndirýshilerin ekonomıkamyzǵa shaqyryp, olarmen shıkizat emes qosylǵan quny joǵary ónim shyǵarý úshin jumys istep jatyrmyz, — dedi mınıstr Aqordada BAQ ókilderine bergen suhbatynda.

Ol Italııa Qazaqstannyń iri taýar seriktesteriniń biri ekenin atap ótti.

— 6 aıdyń qorytyndysynda taýar aınalymy 10,1 mlrd dollar boldy. Onyń ishinde 9,4 mlrd dollar — ol bizdiń eksport. Bıdaı eksportyn arttyrý sharalaryn qabyldadyq. Eksporttaǵy jańa taýar túri — kúnbaǵys maıy. Odan keıin metall buıymdary eksportyn 6 ese ulǵaıttyq. Munaı negizgi pozıtsııa bolyp otyr, — dedi Arman Shaqqalıev.

Aıta keteıik, Aqordada Memleket basshysy Qasym-Jomart Toqaev elimizge resmı saparmen kelgen Italııa Prezıdenti Serdjo Mattarellany qarsy aldy. 

Qazirgi ýaqytta eki el basshylary kelissóz júrgizip jatyr. Onyń barysynda saýda-ekonomıkalyq, ınvestıtsııalyq jáne mádenı-gýmanıtarlyq yqpaldastyqty nyǵaıtý perspektıvalary talqylanady.