Qazaqstan Italııadan vızalyq rejımdi jeńildetý boıynsha qoldaý surady

ASTANA. QazAqparat – Elimiz Italııaǵa vıza berýdi jeńildetý boıynsha usynys bildirdi. Bul týraly QR Premer-Mınıstriniń orynbasary – Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Mádenı-gýmanıtarlyq, ǵylymı-tehnıkalyq jáne óńiraralyq yntymaqtastyqty damytý máseleleri boıynsha ózara sharalardy qoldaý jóninde ortaq pikirge keldik. Osy oraıda, aǵymdaǵy jyly josparlanǵan Ortalyq Azııadaǵy alǵashqy Italııalyq mádenıet ınstıtýtynyń Almaty qalasynda ashylýy bilim jáne jalpy gýmanıtarlyq baılanystarymyzdy odan ári nyǵaıtýǵa óz yqpalyn tıgizbek», - dedi Murat Nurtileý vedomstvoda ótken BAQ ókilderine arnalǵan baspasóz máslıhatynda.

Mınıstrdiń málimdeýinshe, Italııa delegatsııasymen jasalǵan búgingi kelissózderdiń taǵy bir ózekti baǵyty - ekijaqty shart-quqyqtyq baza men konsýldyq máseleler boıynsha jumysty ilgeriletý.

«Osy turǵyda, Antonıo Taıanı myrzadan Qazaqstan azamattary úshin vızalyq rejımdi jeńildetý jónindegi Eýroodaqpen bolatyn resmı konsýltatsııalarda qoldaý kórsetýdi suradym. Italııalyq áriptesimizben kezdesý barysynda óz múddemizdi rastap, jaqyn perspektıvada jumys isteý baǵytynda biraz pikir almastyq. Búgingi kezdesý eki el arasyndaǵy áriptestikti kúsheıtýge qosymsha serpin beretinine shynaıy yqylaspen úmit artamyn», - deıdi ol.

Sondaı-aq, M.Nurtileý ekijaqty kelissóz nátıjesinde birlesken málimdeme qabyldanǵanyn málim etti.