Qazaqstan-Italııa strategııalyq seriktestigi barlyq baǵytta serpindi damyp otyr — Prezıdent
ASTANA. KAZINFORM — 2024 jyly ekijaqty taýar aınalymynyń kólemi 24 paıyzǵa ósip, rekordtyq 20 mlrd dollarǵa jetti. Bul týraly elordada «Ortalyq Azııa — Italııa» sammıtinde Qazaqstan Prezıdenti Qasym-Jomart Toqaev málim etti.
— Italııa Qazaqstannyń iri saýda seriktesteriniń úshtigine kiredi. 2024 jyly ekijaqty taýar aınalymynyń kólemi 24 paıyzǵa ósip, rekordtyq 20 mlrd dollarǵa jetti. Italııanyń sońǵy jyldary elimizge quıǵan ınvestıtsııasynyń kólemi 7,6 mlrd dollardan asty. Bizde ıtalııalyq kapıtaldyń qatysýymen tabysty jumys istep jatqan 270-ke jýyq kompanııa bar, olar Qazaqstannyń munaı-gaz salasyn, balamaly energetıkany, mashına jasaýdy, aýyl sharýashylyǵyn damytýǵa zor úles qosyp keledi, — dedi Qasym-Jomart Toqaev.
Prezıdenttiń paıymynsha, Qazaqstan-Italııa strategııalyq seriktestigi barlyq negizgi kórsetkishter boıynsha turaqty serpindi kórsetip otyr. Sondyqtan bul seriktestik aıasynda odan da aýqymdy ósim áleýeti bar.
— Osy múmkindikti paıdalana otyryp, Italııa Mınıstrler Keńesiniń tóraǵasy Djordja Melonı hanymǵa Qazaqstannyń bastamalaryn úzdiksiz qoldaǵany jáne elderimiz arasyndaǵy qarym-qatynastardy nyǵaıtýǵa qosqan eleýli úlesi úshin shyn júrekten alǵysymdy bildirgim keledi. Qazaqstan ekijaqty kún tártibi aıasynda da, sondaı-aq óńirlik formatta da ózara múddege saı keletin barlyq salada Italııamen jemisti yntymaqtastyqty odan ári jalǵastyrýdy maqsat etedi, — dedi Memleket basshysy.
Budan buryn habarlanǵandaı, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr.
Aıtýly is-sharaǵa qurmetti meımandardan Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp otyr.
Eske salsaq, Qazaqstan men Italııa birqatar qujatqa qol qoıdy.