Qazaqstan Italııa naryǵyna bıdaı men un eksportyn arttyrýǵa daıyn — Prezıdent
ASTANA. KAZINFORM — Qazaqstan Italııaǵa 100-den astam taýar túri boıynsha eksportty ulǵaıtýǵa qaýqarly. Bul týraly elordada «Ortalyq Azııa — Italııa» sammıtinde Qazaqstan Prezıdenti Qasym-Jomart Toqaev málim etti.
— Bizdiń oıymyzsha, birlesken jobalardy iske qosýǵa, eń aldymen, qosylǵan quny joǵary ónim shyǵarý esebinen taýarlardyń túrin kóbeıtýge basa mán berýge bolady. Máselen, Qazaqstan Italııaǵa jalpy quny 1 mıllıard dollarǵa jýyqtaıtyn taýardyń 100-den asa túri boıynsha eksport kólemin arttyrýǵa daıyn, — dedi Qasym-Jomart Toqaev.
Sonymen qatar Prezıdent Ortalyq Azııa elderiniń Eýropaǵa aýyl sharýashylyǵy ónimderin, onyń ishinde organıkalyq ónimderdi jetkizýdi ulǵaıtýda múmkindigi zor ekenin aıtty. Osy oraıda et ónimderiniń, akvasharýashylyq, qurǵaq sútti jáne basqa da azyq-túlik ónimderiniń eksportyna erekshe mán bergen jón.
— Qazaqstan Italııa naryǵyna bıdaı men un eksportyn arttyrýǵa daıyn, — dedi Memleket basshysy.
Qasym-Jomart Toqaev agrarlyq ǵylymı jáne bilim berý ortalyqtary arasyndaǵy tyǵyz yntymaqtastyqqa, ozyq tájirıbeler men tehnologııalar transfertinde baılanystardy nyǵaıtýǵa toqtaldy. Eń aldymen, bıoınjenerııa, turaqty aýyl sharýashylyǵy jáne mal sharýashylyǵy salalaryn qamtý kerek.
— Bizde aýyl sharýashylyǵy ónimderin qaıta óńdeý salasyndaǵy tabysty yntymaqtastyq úshin aıtarlyqtaı múmkindikter bar, — dedi Prezıdent.
Budan buryn habarlanǵandaı, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen «Ortalyq Azııa — Italııa» alǵashqy sammıti ótip jatyr.
Aıtýly is-sharaǵa qurmetti meımandardan Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp otyr.
Eske salsaq, Qazaqstan men Italııa birqatar qujatqa qol qoıdy.