Qazaqstan Italııa kompanııalary úshin qolaıly jaǵdaı jasaýǵa daıyn — Toqaev

ASTANA. KAZINFORM — Qazaqstan óz naryǵynda jumys isteýge nıetti Italııa kompanııalary úshin qolaıly jaǵdaı jasaýǵa daıyn. Bul týraly Aqordada Italııa Prezıdenti Serdjo Mattarellamen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.

— Biz eki eldiń múddesine saı keletin jańa ınvestıtsııalyq jobalardy qarastyratyn boldyq. Ásirese, energetıka, aýyl sharýashyǵy, mashına jasaý, jeńil jáne azyq-túlik ónerkásibi salalaryna basa nazar aýdardyq. Osy jumysqa eki eldiń ekonomıkalyq yntymaqtastyq jónindegi úkimetaralyq komıssııasy basa mán berýi qajet dep sanaımyz. Kólik-logıstıka salasyndaǵy baılanysty nyǵaıtý máselesin pysyqtadyq. Halyqaralyq kólik dálizderiniń, onyń ishinde Transkaspıı dáliziniń áleýetin sóz ettik. Logıstıka ınfraqurylymy jáne qaıta óńdeý ónerkásibi sektoryndaǵy yqpaldastyq múmkindikterin talqyladyq, — dedi Memleket basshysy.

Prezıdent munan bólek tsıfrlyq tehnologııany ekonomıkaǵa jappaı engizýdiń mańyzylyǵy atap ótilgenin aıtty.

— Osy rette jasandy ıntellekti men úlken derek qorlardy paıdalanýǵa qatysty tájirıbe almasý týraly sóılestik. Men bul salalarda birlese jumys isteýge daıyn ekenimizdi jetkizdim. Erteń Prezıdent Matterella myrza aımaqtaǵy eń iri startap parki — Astana habqa baratyn boldy. Elimizdiń osy baǵyttaǵy jetistikterimen tanysady. Buǵan qosa qarjy jáne týrızm salasyndaǵy tyń jobalardy júzege asyrý múmkindigin qarastyrýǵa ýaǵdalastyq. Jalpy, Qazaqstan óz naryǵynda jumys isteýge nıetti Italııa kompanııalary úshin qolaıly jaǵdaı jasaýǵa daıyn, — dedi Prezıdent.

Aıta keteıik, Memleket basshysy Qasym-Jomart Toqaev Italııa Prezıdenti Serdjo Mattarellany birinshi dárejeli «Dostyq» ordenimen marapattady.