Qazaqstan IT ónimderi men qyzmetter eksportyn 500 mln dollarǵa jetkizedi – Toqaev
«Ekonomıkalyq ósim týraly aıtqanda, biz tek tsıfrlar men kórsetkishterge ǵana emes, sapaǵa da mán berýimiz kerek. Osy rette Qazaqstannyń basty muraty – keleshektiń tsıfrlyq ekonomıkasyna kóshý. Tsıfrlyq ıntellekt ındeksine (Digital IQ) sáıkes Qazaqstan tsıfrlandyrý qarqyny boıynsha 20-orynda jáne tsıfrlyq ortany damytý jóninen anaǵurlym perspektıvti elderdiń qataryna kiredi», – dedi Qasym-Jomart Toqaev.
Memleket basshysy 2022 jyly elimizde tsıfrlandyrý salasy 12 paıyzǵa artqanyn aıtty.
«Otandyq tsıfrlyq ónimderdiń halyqaralyq naryqtaǵy básekege qabilettiligi artyp keledi. Byltyr IT ónimderi men qyzmetter eksporty 5 esege artyp, 333 mıllıon dollardy qurady. Maqsatymyz – 2025 jylǵa qaraı bul kórsetkishti 500 mıllıon dollarǵa deıin jetkizý. Degenmen munymen toqtap qalmaımyz. Bul baǵyttaǵy jumysty jalǵastyramyz», - dedi Prezıdent.
