Qazaqstan IT-kompanııalar úshin salyqtyq jeńildikterdi 2045 jylǵa deıin uzartady
ASTANA. KAZINFORM — Jasandy ıntellekt jáne tsıfrlyq damý mınıstrligi elimizdegi tehnologııalyq kásipkerlikti damytý maqsatynda uzaq merzimdi ońtaıly jaǵdaılar jasaý aıasynda birqatar jumystardy bastady. Bul týraly vedomstvonyń baspasóz qyzmeti málim etti.
Ekonomıkany tsıfrlyq transformatsııalaý strategııasyn júzege asyrý aıasynda vedomstvo Astana Hub qatysýshylaryn qoldaýdyń 2028 jyldan keıingi parametrlerin 2045 jylǵa deıin josparlap otyr.
— Bul bastama Qazaqstannyń aımaqtyq IT-hab retindegi ustanymyn nyǵaıtýǵa múmkindik beretin boljamdy ári básekege qabiletti bıznes-ortany qurýǵa baǵyttalǵan. 2045 jylǵa deıingi damýdyń uzaq merzimdi paıymy JI salasyndaǵy jahandyq trendterdi, eksporttyq áleýettiń aýqymyn keńeıtýdi jáne joǵary tehnologııalyq ınvestıtsııalardy tartý qajettiligin eskeredi, — delingen habarlamada.
Atap óter bolsaq, Astana Hub tsıfrlyq ekonomıkany damytýdaǵy tıimdiligin dáleldedi, sondyqtan vedomstvonyń búgingi mindeti — qol jetkizilgen qarqyndy saqtaı otyryp, árbir IT-kompanııa úshin ondaǵan jyldarǵa josparlaý múmkindigin qamtamasyz etetin, sapaly serpilis jasaý.
— Qazirgi tańda Astana Hub ekojúıesi senimdi ósim kórsetýde: habta 2 268 kompanııa tirkelgen, 35 myń joǵary bilikti jumys orny qurylǵan, 438 mlrd teńge ınvestıtsııa tartylǵan, al qazaqstandyq IT-sheshimderdiń eksport kólemi 1,9 mlrd AQSh dollaryn qurady, — dep habarlady mınıstrlikten.
Qazirgi ýaqytta Jasandy ıntellekt jáne tsıfrlyq damý mınıstrligi sarapshylar qaýymdastyǵymen jáne múddeli memlekettik organdarmen birlesip, osy jumystar aıasynda qoldanystaǵy tetikterdi taldap, beıimdeý jumystaryn júrgizýde. Mundaǵy basty nazar ınnovatorlar úshin biregeı ortany qalyptastyrýǵa, adamı kapıtaldy damytýǵa jáne JI salasyndaǵy ozyq sheshimderdi engizýge aýdarylady.
Astana Hub-tyń damýyna arnalǵan uzaq merzimdi strategııany qalyptastyrý — Qazaqstandy álemdegi tehnologııalyq bıznes úshin eń tartymdy ıýrısdıktsııalardyń birine aınaldyrýdy kózdeıtin memlekettik saıasattyń basym baǵyty bolyp tabylady.
Aıta keteıik, memlekettik basqarýdyń jańa tsıfrlyq modeli engiziledi.
