Qazaqstan Ispanııaǵa aýyl sharýashylyǵy ónimderi eksportyn arttyrýdy kózdep otyr
ASTANA. KAZINFORM – Parıjde ótken Dúnıejúzilik janýarlar densaýlyǵy uıymynyń (DJDU) 93-Bas sessııasy aıasynda Qazaqstannyń Aýyl sharýashylyǵy mınıstri Aıdarbek Saparov Ispanııanyń Aýyl sharýashylyǵy, balyq sharýashylyǵy jáne azyq-túlik mınıstri Lýıs Planasmen kezdesti.
Taraptar agrarlyq yntymaqtastyqtyń qazirgi ahýaly men strategııalyq perspektıvalaryn, sondaı-aq ózara taýar aınalymyn keńeıtý máselelerin talqylady.
- Biz qalyptasqan syndarly dıalogty joǵary baǵalaımyz jáne Ispanııamen agrarlyq saladaǵy ekijaqty yntymaqtastyqty odan ári nyǵaıtýǵa daıynbyz. Búginde eki el arasynda aýyl sharýashylyǵy men agroónerkásiptik keshen ónimderiniń saýdasy baǵytynda ózara is-qımyl belsendi damýda. Sonymen qatar, ekijaqty yqpaldastyq áleýeti tolyq paıdalanylmaı keledi, — dep atap ótti Aıdarbek Saparov.
Byltyrǵy jyldyń qorytyndysy boıynsha Ispanııaǵa tasymaldanatyn aýyl sharýashylyǵy ónimderi eki esege artty. Negizinen astyq, dándi-burshaqty daqyldar jáne efır maılary eksporttaldy.
Qazaqstan tarapy Ispanııa naryǵyna astyq jáne maıly daqyldar, qaıta óńdelgen ónimder, mal azyǵy jáne ózara qyzyǵýshylyq týdyratyn basqa da aýyl sharýashylyǵy taýarlaryn keń kólemde jetkizýge daıyn ekenin málimdedi.
Sondaı-aq qos tarap agrotehnologııalar, ırrıgatsııa, aýyl sharýashylyǵy ónimderin óńdeý, mal sharýashylyǵy, selektsııa, zamanaýı sheshimderdi engizý jáne veterınarııa salalaryndaǵy seriktestik keleshegine kóńil bóldi.
Áriptestiktiń negizgi qozǵaýshy kúshteriniń biri ınvestıtsııalyq yntymaqtastyq. Qazaqstan ıspan kompanııalarynyń qatysýymen birlesken jobalardy júzege asyrýǵa, sonyń ishinde «Big Farm» seriktestigi qatysatyn et óndirisi boıynsha tiginen ıntegratsııalanǵan keshen qurýǵa qyzyǵýshylyq tanytyp otyr.
Joba Aqmola oblysynyń Ereımentaý aýdanynda 20 myń bas «Angýs» tuqymdy iri qara malyn ósirýdi kózdeıdi. Jobany iske asyrý úshin 70 myń gektar jer telimi bólingen. Jalpy ınvestıtsııa kólemi 132 mln eýro, sondaı-aq 250 jumys ornyn ashý josparlanǵan.
Óz kezeginde Lýıs Planas Ispanııanyń Qazaqstanmen agrarlyq saladaǵy yntymaqtastyqty odan ári damytýǵa múddeli ekenin jáne ózara saýda men birlesken ınvestıtsııalyq jobalardy arttyrý áleýetiniń zor ekenin atap ótti.
Kezdesý ıeleri salalyq qurylymdar, bıznes qaýymdastyqtar men eki eldiń ǵylymı uıymdary arasyndaǵy tikeleı baılanystardy damytýǵa jáne belsendi ózara is-qımyl jasaýǵa daıyn ekenderin bildirdi.
Aıta ketelik Túrkistan oblysynda sharýalar jylyjaı qyzanaǵyn ótkize almaı otyrǵany týraly jazǵan edik.
