Qazaqstan ıslam elderiniń naryǵyn aýyl sharýashylyǵy ónimderimen toltyrmaq
NUR-SULTAN. QazAqparat - Qazaqstanda otandyq kásiporyndardyń syrtqy naryqqa shyǵýyna múmkindik beretin jol kartasy daıyndalyp jatyr. Bul týraly búgin Úkimet úıindegi baspasóz máslıhatynda QR Aýyl sharýashylyǵy vıtse-mınıstri Gúlmıra Isaeva aıtty, dep habarlaıdy QazAqparat tilshisi.
«Biz eki jol kartasyn ázirlep, memlekettik organdarmen kelistik. Atalǵan kartalar otandyq bızneske ózge elderdiń naryqtaryna shyǵyp, atalǵan naryqtardan mol paıda alýyna septigin tıgizedi dep oılaımyz. Ol - organıkalyq óndiristi damytý jónindegi jol kartasy. Onda ózge de memlekettik organdarmen birge sheshimin tabýy tıis máselelerdi kóterip otyrmyz. Máselen, Indýstrııa jáne ınfraqurylymdyq damý mınıstrligimen birge organıkalyq ónimderdi sertıfıkattaý jáne akrredıtteý, Aqparat jáne qoǵamdyq damý mınıstrligimen «halal» ónimdi sertıfıkattaý máselesin sheshýimiz qajet. Osylaısha, ıslam elderine eksport kólemin ulǵaıtý maqsatyn qoıyp otyrmyz», - dedi ol.
Onyń sózine qaraǵanda, «halal» standarty túrli elderdiń erekshelikterin eskerýi tıis.
«Eger qazir biz ónimniń árbir toptamasyn «halal» standartyna sáıkes sertıfıkattamasaq bul múmkin emes. Buǵan qosa, naryq ereksheligin de eskerýimiz qajet. Sebebi qazirgi ýaqytta qazaqstandyq kásiporyndardyń basym bóliginde malaızııalyq «halal» standartynyń sertıfıkaty bar», - dedi G.Isaeva.
Degenmen, vıtse-mınıstr sózine qaraǵanda, bul standarttardyń keıbir elderde aıyrmashylyǵy bar.
«Birikken Arab Ámirlikteri naryǵynyń óz standarttar talaby bar ekendigin bilemiz. Sol sebepti bul jol kartasy barlyq jaıttardy eskeredi. Al jol kartasyn jáne onyń aıasynda josparlanǵan sharalardy júzege asyrý fermerlerimizge eksport kólemin arttyrýǵa septigin tıgizedi dep oılaımyn», - dedi vıtse-mınıstr.
