Qazaqstan Islam damý bankinen $1,1 mlrd qarjy tartpaq
ASTANA. KAZINFORM - Djıdda qalasynda Qazaqstan Respýblıkasy Úkimetiniń ókili – QR Premer-mınıstriniń keńesshisi Nurlan Baıbazarovtyń Islam damý bankiniń (IDB) prezıdenti Muhammed Súleıman ál-Djassermen ekijaqty kezdesýi ótti, dep habarlaıdy Úkimettińbaspasóz qyzmeti.
Kelissózder barysynda taraptar Qazaqstandaǵy basym ınfraqurylymdyq jobalardy qarjylandyrý salasyndaǵy yntymaqtastyqty tereńdetý múmkindikterin talqylady. Arnaıy ekonomıkalyq jáne ındýstrııalyq aımaqtarda ınjenerlik jáne kólik ınfraqurylymyn damytýǵa erekshe nazar aýdaryldy. Kezdesýdiń negizgi qorytyndysy osy maqsattardy júzege asyrý úshin Islam damý bankinen $1,1 mlrd-qa deıingi somaǵa qarjy tartý týraly ýaǵdalastyq boldy.
Qol jetkizilgen ýaǵdalastyqtarǵa qosymsha Qazaqstan Respýblıkasynyń Úkimeti men Islam damý banki arasynda nıetter týraly hattamaǵa qol qoıyldy. Qujat taraptardyń arnaıy ekonomıkalyq jáne ındýstrııalyq aımaqtardy damytý sheńberinde ıslamdyq qarjylandyrý quraldaryn qoldana otyryp, jobalardy qarjylandyrý tetikterin tájirıbe júzinde pysyqtaýǵa ózara daıyndyǵyn kórsetedi.
Atalǵan yntymaqtastyqty júzege asyrý eldiń ınfraqurylymdyq damýyna qýatty serpin beredi, 1,6 trln teńgeden astam ınvestıtsııalar aǵynyn qamtamasyz etedi jáne 16 myńnan astam jumys ornyn ashady dep kútilýde, bul óz kezeginde Qazaqstannyń jedel ındýstrııalandyrylýyna jáne ekonomıkalyq ártaraptandyrylýyna yqpal etetin bolady.
Bul bastama 2024 jylǵy 25 maýsymda qol qoıylǵan Qazaqstan Respýblıkasynyń Úkimeti men Islam damý banki arasyndaǵy strategııalyq ózara is-qımyl týraly negizdemelik baǵdarlamalyq kelisimde aıqyndalǵan baǵytty jalǵastyrady. Osy kelisim aıasynda taraptar jalpy somasy $8 mlrd-tan asatyn ınvestıtsııalyq jobalardy iske asyrý nıetin rastady.
Júzege asyrýdyń birinshi kezeńi klımatqa turaqty sý resýrstaryn damytý jobasy boldy, ol úshin Islam damý banki óz tarıhyndaǵy eń iri qaryz — $1,15 mlrd somasyna nesıe berdi. Qarajat jalpy uzyndyǵy 3 618 shaqyrym bolatyn 8 sý qoımasyn salýǵa jáne rekonstrýktsııalaýǵa, sondaı-aq 115 sýarý kanalyn jańǵyrtýǵa baǵyttalǵan. Joba eldiń sý jáne ekologııalyq qaýipsizdigin arttyrýǵa baǵyttalǵan jáne aýyl sharýashylyǵyn turaqty damytý úshin negiz qalyptastyrady.
Kezdesý barysynda «Qazaqstannyń Damý banki» AQ — «Báıterek» UBH» AQ enshiles uıymynyń qatysýymen ıslamdyq ınvestıtsııalardy tartý máselelerin qosa alǵanda, ıslamdyq qarjylandyrý salasyndaǵy yntymaqtastyqtyń negizgi baǵyttary belgilendi.
Osyǵan deıin Úkimettiń gallııge eksporttyq kedendik bajdy alyp tastaǵany týraly jazdyq.