Qazaqstan ISESKO-men birlesken jobalardy keńeıtýge daıyn ekenin rastady
ASTANA. KAZINFORM- Qazaqstannyń Marokkodaǵy Elshisi jáne Islam áleminiń bilim, ǵylym jáne mádenıet uıymy (ISESKO) janyndaǵy Turaqty ókili Sáýlekúl Saılaýqyzy ISESKO Bas konferentsııasynyń 4-shi kezekten tys sessııasyna qatysty, dep habarlaıdy QR Syrtqy ister mınıstrliginiń baspasóz qyzmeti.
Іs-sharaǵa 40 múshe memlekettiń mınıstrlik deńgeıdegi ókilderi, sondaı-aq elshiler men ulttyq komıssııalardyń bas hatshylary qatysty.
Sessııa barysynda múshe memleketter Uıymnyń qarjylyq turaqtylyǵyn odan ári nyǵaıtý, onyń baǵdarlamalary men qyzmetin tıimdi iske asyrý, sondaı-aq ISESKO-nyń qarjylyq derbestigin saqtaı otyryp, jarnalardyń turaqty tólenýin qamtamasyz etý tetikteri jónindegi máselelerdi talqylady.
Talqylaýlardyń qorytyndysy boıynsha qatysýshylar Bas hatshylyqtyń qarjylyq jáne ákimshilik sharalar týraly baıandamasyn qabyldap, Uıym qyzmetiniń turaqtylyǵyn qamtamasyz etý jónindegi jedel josparda kózdelgen ýaqytsha sharalardy bekitti. Onyń basty baǵyty múshe memleketterdiń jarnalary men bereshekterin retteý bolyp tabylady.
Sessııada sóz sóılegen qazaq delegatsııasynyń basshysy S.Saılaýqyzy Qazaqstannyń ISESKO-ǵa múshelik etken jyldar boıy mindetti múshelik jarnalaryn úzdiksiz ári tolyq kólemde tólep kele jatqanyn, sondaı-aq Uıym qyzmetine turaqty túrde erikti qoldaý kórsetip otyrǵanyn atap ótti.
Qazaqstandyq dıplomat barlyq múshe memleketterdi óz qarjylyq mindettemelerin ýaqtyly oryndaýǵa shaqyryp, Uıymnyń turaqtylyǵy onyń músheleriniń ujymdyq tártibi men yntymaqtastyǵyna tikeleı baılanysty ekenin alǵa tartty.
Sonymen qatar qazaq tarapy sessııada usynylǵan jobalyq qararlardyń qabyldanýyn qoldap, ISESKO-men birlesken jobalar men baǵdarlamalardy iske asyrý arqyly praktıkalyq yntymaqtastyqty jalǵastyrý jáne keńeıtý daıyndyǵyn rastady.
Qazaqstannyń Bas konferentsııanyń kezekten tys sessııasyna qatysýy eldiń ISESKO-nyń ınstıtýtsıonaldyq jáne qarjylyq turaqtylyǵyn qoldaýdaǵy dáıekti ustanymyn jáne ıslam álemindegi bilim, ǵylym jáne mádenıet salasyndaǵy kópjaqty yntymaqtastyqqa degen berik ustanymyn rastaıdy.
Osyǵan deıin Qazaqstannyń ıÝNESKO jáne ISESKO isteri jónindegi ulttyq komıssııasynyń otyrysy týraly jazdyq.
