Qazaqstan Irlandııanyń avıatsııalyq bılik oryndarymen kelisimge qol qoıdy

NUR-SULTAN. QazAqparat - Qazaqstannyń avıatsııalyq ákimshiligi Irlandııanyń avıatsııalyq bılikterimen sol elde tirkelgen jáne qurǵaq lızıng sharttary boıynsha qazaqstandyq áýe kompanııalary paıdalanatyn áýe kemelerin baqylaý jáne qadaǵalaý jónindegi mindetterdi berý týraly kelisimge qol qoıdy. Bul týraly QazAqparat QR Indýstrııa jáne ınfraqurylymdyq damý mınıstrliginiń saıtyna silteme jasap habarlaıdy.

Qol qoıý rásimine QR Indýstrııa jáne ınfraqurylymdyq damý mınıstri Beıbit Atamqulov, Irlandııa avıatsııalyq basqarmasynyń dırektory Dıarmýd o ' Kongeıl, QR IIDM Azamattyq avıatsııa komıtetiniń tóraǵasy Talǵat Lastaev, AAK Bas dırektory Pıter Grıffıts qatysty.

Búgingi tańda «Eır Astana» ulttyq tasymaldaýshysy Arýbada tirkelgen óz ushaqtaryn paıdalanady. Olardy lıtsenzııalaý, ushý jaramdylyǵy jáne ushý quramyn sertıfıkattaý negizinen osy elde júzege asyrylady. Mundaı sheshim áýe kompanııasynyń Eýropaǵa mańyzdy reıstermen ushýy úshin «qara tizim» kezeńinde qajet boldy. Mınıstrlik 2024 jyly Qazaqstannyń tiziliminde zamanaýı áýe kemelerin tirkeýge múmkindik berý baǵytynda jumys istep jatyr.

Osy maqsatta aldymen áýe flotyn eki kezeńdi protsess aıasynda Irlandııa tizilimine aýystyrýdy bastaý kerek. Ol shamamen eki jylǵa sozylady. Shara EASA (ushý qaýipsizdigi jónindegi Eýropalyq agenttik) normatıvtik standarttaryna sáıkestigi úshin qajet jaǵdaılar jasaýǵa múmkindik beredi.

Qol qoıylǵan kelisim sharttary boıynsha «Eır Astana» kompanııalar tobynyń barlyq áýe kemeleri bir jyl ishinde Irlandııa tizilimine aýystyrylady.

Taraptar qazaqstandyq áýe kompanııalary paıdalanatyn áýe kemeleriniń ushý qaýipsizdigin qadaǵalaýdy qamtamasyz etý máseleleri boıynsha tyǵyz yntymaqtasa jumys isteıdi. Kelisim sharttarynda, sondaı-aq, halyqaralyq avıatsııalyq uıymdar júrgizetin aýdıtten ótýge kómek berý kózdelgen.

Qol jetkizilgen ýaǵdalastyqtar álemdik avıatsııalyq qoǵamdastyqqa Qazaqstannyń ushý qaýipsizdigin qamtamasyz etý deńgeıin arttyrý boıynsha jumysta qol jetkizgen jetistikterin kórsetedi jáne otandyq avıatsııa úshin «qara tizim» máselesi budan bylaı ózekti emestigin bildiredi.