Qazaqstan iri qara mal etin qaı elderge eksporttaıdy

ASTANA. QazAqparat - QR Aýyl sharýashylyǵy mınıstrligi Qazaqstannyń 2018 jyly iri qar mal etin eksportqa shyǵarýdy kózdep otyrǵan memleketterdi atady. Atalmysh elderdiń tizim «QazAqparat» HAA tilshisiniń resmı saýalyna jaýap joldaǵan QR Aýyl sharýashylyǵy mınıstrliginiń jaýabynda kórsetilgen.

Mınıstrliktiń joldaǵan jaýaby boıynsha, qazirgi tańda elimizde asyl tuqymdy iri qara maldyń (ІQM) 704,6 myń basy bar. Bul jalpy mal basynyń 11 paıyzyn quraıdy.

«QR Ulttyq ekonomıka mınıstrligi Statıstıka komıtetiniń deregine sáıkes, 2013-2017 jyldar aralyǵynda ІQM basynyń sany 15,2% kóbeıip, 6745,4 myń basty qurady. Sonymen qatar asyl tuqymdy ІQM basy joǵaryda atalǵan jyldary 38,1 paıyzǵa ósken», - delingen jaýapta.

Jaýaptaǵy málimetterge sáıkes, 2017 jyly eksporttalǵan iri qara mal eti 5,5 myń tonnadan asyp, onyń 90 paıyzy Reseı Federatsııasyna eksporttalǵan. Al eksporttyń qalǵan bóligi TMD, Qıyr Shyǵys jáne Batys Eýropaǵa tıesili. Sonymen birge, búgingi tańda Qytaı Halyq Respýblıkasy otandyq ónimdi satyp alýǵa qyzyǵýshylyq tanytyp otyr.

«QR AÓK damytýdyń 2017-2021 jyldarǵa arnalǵan memlekettik baǵdarlamasyn iske asyrý boıynsha 2018 jyly nysanaly ındıkatorlar men kórsetkishterdiń otandyq ónimniń eksporttyq áleýetin arttyrý maqsatynda 15,0 myń tonna iri qara mal etin eksporttaý kózdelýde. Onyń teń jartysy RF, al qalǵan bóligi QHR, Iranǵa, BAÁ, Saýd Arabııa Koroldigi, Katar, sonymen birge EAEO jáne Ortalyq Azııaǵa eksporttaý josparlanyp otyr», - dep habarlaıdy QR AShM.

Eske sala ketsek, 9 aqpan kúni ótken Úkimettiń keńeıtilgen májilisinde QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev Qazaqstan bıyl 15 myń tonna ettiń eksportqa shyǵarylatynyn habarlaǵan bolatyn.