Qazaqstan Irannyń ıadrolyq baǵdarlamasy boıynsha «altylyqtyń» kelissózderi sátti ótýine múddeli
Bul týraly búgin Astanadaǵy brıfıngte QR Prezıdenti janyndaǵy Ortalyq kommýnıkatsııalar qyzmetiniń resmı ókili Altaı Ábıbýllaev málim etti.
Esterińizge sala keteıik, ótken aptada Mıýnhendegi Qaýipsizdik boıynsha halyqaralyq konferentsııada Irannyń Syrtqy ister mınıstri Alı Akbar Salehı «altylyq» kelissózderiniń kelesi kezeńi 25 aqpanda Qazaqstanda ótkiziletindigi jaıly málimdegen bolatyn.
«Qazaqstan óz jaǵynan birneshe márte atalǵan kelissózderdi qabyldaýǵa daıyn ekenin jarııalaǵan edi. Atap aıtqanda, byltyr bul másele turǵysynda Irannyń Syrtqy ister mınıstrin qabyldaý kezinde Elbasy málimdegen bolatyn. Kelissóz úderisindegi barlyq múddeli taraptarmen atalǵan merzim men ótkiziletin jer boıynsha sońǵy jáne resmı kelisimge qol jetkizilse, biz qabyldaýshy tarap retinde elimizdiń aýmaǵynda bul kelissózderdiń sátti ótýi úshin barynsha qolaıly jaǵdaı jasaý turǵysynda barlyq kúsh-jigerimizdi salamyz»,-dep túıdi resmı ókil.
