Qazaqstan Iranmen taýar aınalymyn 3 mlrd dollarǵa jetkize alady – Saýda mınıstri
ASTANA. KAZINFORM – Bul týraly Almaty qalasynda QR Saýda jáne ıntegratsııa mınıstri Arman Shaqqalıevtiń Irannyń ónerkásip, kenishter jáne saýda mınıstriniń orynbasary, Saýdany damytý uıymynyń basshysy Mohammad Alı Dehgan Dehnavımen kezdesýi barysynda aıtyldy.
QR Saýda jáne ıntegratsııa mınıstrligi baspasóz qyzmetiniń habarlaýynsha, kezdesýde eki el arasyndaǵy ózara taýar aınalymyn ulǵaıtý máselesi talqylandy.
«Biz Iranmen taýar aınalymyn 3 mıllıard dollarǵa deıin arttyrý múmkindigin kórip otyrmyz. Iran naryǵyna jetkizý úshin 162 mıllıon dollar somasyna astyq, kúnbaǵys maıy, et ónimderi jáne basqa da taýarlardy qosa alǵanda, 60-tan astam taýar pozıtsııasyn usynýǵa daıynbyz», - dep atap ótti mınıstr Arman Shaqqalıev.
Ol Qazaqstan eki memleket basshylary qol jetkizgen ýaǵdalastyqtardy belsendi túrde júzege asyryp jatqanyn aıtty. Iran Qazaqstannyń Taıaý Shyǵystaǵy negizgi seriktesteriniń biri bolyp tabylady.
Eki eldiń saýda qatynastaryn nyǵaıtý úshin alda ótetin saýda-ekonomıkalyq mıssııa, sondaı-aq 2025 jyldyń aqpanynda Tegeranda josparlanǵan bıznes-forým mańyzdy ról oınamaq. Mıssııanyń maqsaty - elder arasyndaǵy ekijaqty qarym-qatynasty nyǵaıtý, qazaqstandyq óndirýshiler men ırandyq satyp alýshylar arasynda tikeleı baılanystar ornatý, sondaı-aq Qazaqstannyń eksporttyq áleýetin keńeıtý bolyp tabylady. Oǵan qosa saýda-ekonomıkalyq áriptestikti damytýǵa yqpal ete otyryp, eki eldiń bıznesi úshin jańa múmkindikterge jol ashylady.
2024 jyldyń 11 aıynyń qorytyndysy boıynsha Qazaqstan men Iran arasyndaǵy taýar aınalymy 296 mıllıon AQSh dollaryn qurady, bul ótken jyldyń sáıkes kezeńimen salystyrǵanda 8,1%-ǵa artyq. Qazaqstannan Iranǵa eksport kólemi 29,1%-ǵa ósip, 100,6 mıllıon AQSh dollaryn qurady.
Qazaqstannan Iranǵa jetkiziletin negizgi taýarlar arpa, bıdaı, raps dáni, kúnbaǵys maıy, júgeri, sondaı-aq, qoı, eshki jáne sıyr eti.
Osyǵan deıin Qazaqstan men Iran arasyndaǵy agroónerkásip taýarlary aınalymy 25%-ǵa óskeni týraly jazǵan edik.