Qazaqstan Iranǵa ýran satady degen málimetti taratqan aqparat quralynyń taǵdyryn sot sheshýi tıis - senator
ASTANA. Qańtardyń 14-i. QazAqparat /Aıdar Ospanalıev/ - «Elimizdiń quzyrly organdary Qazaqstan Iranǵa ýran satady degen jalǵan aqparat taratqan aqparat quralyn sotqa berý jaǵyn oılastyrýy kerek», dedi senator Baýyrjan Muhamedjanov.
Bul pikirin ol búgin Parlament Senatynyń Halyqaralyq ister, qorǵanys jáne qaýipsizdik komıtetiniń keńeıtilgen otyrysynda bildirdi.
Senatordyń paıymdaýynsha, atalmysh aqparatty taratqan basylym Qazaqstanǵa tek moraldyq qana emes, saıası jáne ekonomıkalyq nuqsan keltirdi. «Sóıte otyryp aqparat quraldary ókilderiniń ózderi taratqan málimetti qaıdan alǵandyǵyn «qupııa ustaýǵa quqymyz bar» dep jaltarýy jónsiz. Qazaqstan óziniń múddesin qorǵaýy tıis. Sondyqtan elimizdiń zań organdary bul máseleni sottyń qaraýymen sheshiletindeı jaǵdaıǵa jetkizýi tıis degen oıdamyn», dedi B.Muhamedjanov.
Otyrysta senatordyń osy pikirin qoldaıtyndyǵyn bildirgen depýtat Ǵanı Qasymov, «biz úshin bul kóńil aýdararlyq jaǵdaı. Biz eshqashanda qandaı da bir sheteldik basylymdy nemese aqparat quralyn sotqa bergen emespiz. Buǵan nemquraıly qaraý - ózińdi álem aldynda masqara etý. Biz kez kelgen beıbastyqqa kóne bermeıtindigimizdi kórsetýimiz kerek. Atalmysh aqparattyń jalǵan ekendigin halyqaralyq uıymdar da moıyndap otyr. Biz bul jerde qandaı da bir paıda tabýdy kózdep otyrǵan joqpyz. Osy málimetti taratqan aqparat quraly óziniń qateligin moıyndap, keshirim surasyn. Bul ózgelerge úlgi bolady. Áıtpese mundaı árekettiń aldaǵy ýaqytta da qaıtalanbaıtyndyǵyna eshkim de kepil bola almaıdy», dedi Ǵ.Qasymov.
