Qazaqstan Iranǵa sıyr etin tasymaldaıtyn boldy
ASTANA. QazAqparat - Qazaqstan Iran eline sıyr eti men jumyrtqa tasymaldaý jóninde kelisimge keldi, dep habarlaıdy «QazAqparat» HAA tilshisi.
QR Aýyl sharýashylyǵy mınıstrliginiń Qoǵammen baılanys departamentiniń keltirgen málimetine sáıkes, Tegeranda (Iran Islam Respýblıkasy) QR Aýyl sharýashylyǵy mınıstrliginiń vıtse-mınıstri Gúlmıra Isaeva bastaǵan delegatsııa Iran veterınarlyq uıymymen aýyl sharýashylyǵy ónimderin jetkizý máseleleri boıynsha ekijaqty kezdesýi ótkizgen.
«Osy kezdesý eki eldiń veterınarlyq uıymdarynyń aldyn ala júrgizgen jumystarynyń nátıjesi bolyp tabylady. Kelissóz nátıjesi boıynsha eksporttyń veterınarlyq talaptary kelisildi», - delingen habarlamada.
Osylaısha, Qazaqstanda óndirilgen taýyq jumyrtqasy Iranǵa tek Iran Islam Respýblıkasynyń talaptaryna saı belgilengen (ár jumyrtqada óndirilgen kúni, oralǵan kúni, jaramdylyq merzimi, óndirýshi kórsetiledi) kúıde jetkiziletin bolady.
«Maldy arnaıy bordaqylaý arqyly alynǵan qazaqstandyq mal eti halyqaralyq talaptarǵa sáıkes 5-6 kún boıy saqtalady. Bul óz kezeginde ettiń Iran naryǵynda suranysqa ıe bolýyna múmkindik beredi», - dep habarlaıdy vedomstvodan.
Eksporttyq tasymaldy osy aıda bastaý josparlanyp otyr.
