Qazaqstan Iranǵa muzdatylǵan et eksporttamaq
Eki jaqty memorandýmǵa 2023 jyldyń 3 jeltoqsany kúni Tegeranda mınıstrdiń orynbasary jáne Irannyń veterınarlyq uıymynyń basshysy Modjtaba Norýzı men Qazaqstannyń aýyl sharýashylyǵy vıtse-mınıstri Amanǵalı Berdalın qol qoıdy.
Bul týraly Kazinform QR Aýyl sharýashylyǵy mınıstrliginiń baspasóz qyzmetine silteme jasap habarlaıdy.
Bul qujat otandyq mal sharýashylyǵynyń muzdatylǵan etin jetkizýdiń jańa eksporttyq joldaryn ashady. Osy ýaqytqa deıin qazaqstandyq óndirýshiler Iranǵa saqtaý merzimi 3 kúnge deıingi salqyndatylǵan sıyr etin ǵana jetkize alatyn.
Ýaǵdalastyq týraly qujatta mynadaı talaptar qarastyrylǵan:
1.Qazaqstandyq muzdatylǵan sıyr etiniń súıeksiz ımportyna qoıylatyn veterınarııalyq-sanıtarııalyq talaptar.
Iran tarapy Qazaqstannan muzdatylǵan súıeksiz sıyr etiniń ımportyna qoıylatyn veterınarııalyq-sanıtarııalyq talaptardy usynady. Veterınarııalyq-sanıtarııalyq talaptardy keliskennen keıin Qazaqstannan Iranǵa muzdatylǵan súıeksiz sıyr etiniń eksportyn ashý úshin Iran veterınarııalyq uıymynyń basshylary men Qazaqstan Respýblıkasy Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń tóraǵasy arasynda veterınarııalyq sertıfıkattardy kelisedi jáne kelisimge qol qoıady.
2.Irandyq sút kompanııalaryn Eýrazııalyq ekonomıkalyq odaqtyń (EAEO) aýmaǵyna jáne Qazaqstan Respýblıkasyna ımporttaýǵa quqyǵy bar úshinshi elderdiń tizilimine engizý týraly.
Qazaqstandyq tarap EAEO jáne Qazaqstan Respýblıkasy ınspektorlarynyń, Irannyń veterınarııalyq qyzmetiniń jáne Irannyń sút kásiporyndarynyń qatysýymen aýdıt jáne birlesken ınspektsııa ótkizilgennen keıin, EAEO aýmaǵyna jáne Qazaqstan Respýblıkasyna sút ónimderin ımporttaýǵa quqyǵy bar úshinshi elderdiń tizilimine Iran sút kásiporyndaryn qosý týraly yntymaqtasýǵa daıyn.
3.Vakýýmdyq qaptamadaǵy iri qara maldyń jańa etiniń jaramdylyq merzimine qatysty ǵylymı qujattar
Qazaqstan tarapynyń vakýýmdy qaptamadaǵy iri qara maldyń jańa etiniń jaramdylyq merzimin 3 kúnnen 16 kúnge deıin ulǵaıtý ótinishi boıynsha Iran tarapy Qazaqstannan jaramdylyq merzimine qatysty ǵylymı qujattardy surady. Irannyń veterınarlyq uıymy ımport jáne eksport boıynsha tehnıkalyq komıtette usynylǵan qujattardy qaraıdy.
