Qazaqstan Irandaǵy jaǵdaıǵa baılanysty ózi eksporttaıtyn taýarlardyń baǵasyn ósire me

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Qazaqstan Irandaǵy jaǵdaıǵa baılanysty saýda saıasatyn ózgertpeıtinin aıtty.

Irandaǵy jaǵdaıǵa baılanysty Qazaqstan eksporttaıtyn taýarlardyń baǵasy ózgere me, - dep surady BAQ ókili Senattyń jalpy otyrysynan keıin.

Serik Jumanǵarın bul jaıynda áńgime qozǵaýǵa áli erte dep esepteıtinin aıtty.

- Shynymdy aıtsam, ne bolaryn, qalaı bolatynyn bilmeımin. Bizde qosalqy joldar bar. Grýzııa arqyly nemese Qytaı porttary arqyly shyǵa alamyz. Bul logıstıkany biraz qıyndatady. Biraq biz úshin uzaq merzimdi saldary bolsa, túrli joldardy oılastyryp, bıznesmenderge kómektesemiz. Bizdiń taýarlar bırja arqyly satylady. Sondyqtan baǵany ósiremiz dep oılamaımyn. Óıtkeni baǵany biz belgilemeımiz, syrtqy naryq aıqyndaıdy. Báseke óte joǵary. Sondyqtan bizge bırja belgilegen baǵamen satamyz, - dedi vıtse-premer.

Aıta keteıik, búgin Senat jańa Salyq kodeksin Májiliske qaıtardy.