Qazaqstan Irandaǵy qaıǵyly oqıǵalarǵa baılanysty kóńil aıtty
ASTANA. KAZINFORM – Qazaqstan Syrtqy ister mınıstrliginiń resmı ókili Erlan Jetibaev Irandaǵy qaıǵyly oqıǵalarǵa baılanysty Iran halqyna kóńil aıtty.
– Keıingi qaıǵyly oqıǵalar saldarynan beıbit turǵyndardyń, onyń ishinde balalardyń, sondaı-aq Islam Respýblıkasynyń joǵary basshylyǵy ókilderiniń qaza bolýyna baılanysty Iran halqyna qaıǵyryp kóńil aıtamyz. Qazaqstan dostyq pen jan-jaqty yntymaqtastyq qatynastaryn dáıekti túrde damytyp kele jatqan jáne Iranǵa qarsy soǵysqa qatyspaıtyn arab memleketteriniń azamattyq nysandaryna jasalǵan soqqylarǵa baılanysty ókinish bildiredi.
Halyqaralyq gýmanıtarlyq quqyq normalaryn saqtaý qarýly qaqtyǵystar kezinde azamattyq nysandar men beıbit halyqty erekshe qorǵaýdy talap etedi. Qazaqstan Halyqaralyq gýmanıtarlyq quqyqqa saıası beıildilikti kúsheıtý jónindegi jahandyq bastamany usynýshylardyń biri retinde qarýly qaqtyǵystar jaǵdaıynda adamgershilikti saqtaýdyń mańyzdylyǵyn atap ótedi. Qazaqstan halyqaralyq daýlar men qaqtyǵystardy halyqaralyq quqyq normalary men BUU Jarǵysyn qatań saqtaı otyryp, tek saıası-dıplomatııalyq jolmen retteý qajettigi jónindegi óziniń qaǵıdatty ustanymynyń ózgermeıtinin rastaıdy.
Óńirdegi zorlyq-zombylyqtyń odan ári ýshyǵýyna jol bermeý maqsatynda barlyq tarapty barynsha ustamdylyq pen jaýapkershilik tanytýǵa shaqyramyz, - dedi Qazaqstan Syrtqy ister mınıstrliginiń resmı ókili Erlan Jetibaev.
Eske sala keteıik, buǵan deıin Taıaý Shyǵystaǵy qazaqstandyqtarǵa arnalǵan baılanys paketteri iske qosylǵanyn jazǵan edik.