Qazaqstan Iran naryǵyna jetkiziletin arpa kólemin birneshe ese kóbeıte alady

ASTANA. KAZINFORM — Iran naryǵyna jetkiziletin arpanyń kólemin Qazaqstan birneshe ese kóbeıte alady. Bul týraly Aqordada Iran Islam Respýblıkasynyń prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.

– Taǵy bir mańyzdy sala – aýyl sharýashylyǵy. Qazaqstan Iran naryǵyna astyq jáne basqa da dándi-daqyl tasymaldaıdy. Mysaly, byltyr 500 myń tonnadan astam arpa jetkizdik. Onyń kólemin birneshe ese kóbeıtýge múmkindigimiz bar. Osy máseleni Masýd Pezeshkıan myrzamen jan-jaqty talqyladyq. Qazaqstan aýyl sharýashylyǵyn tsıfrlandyrýǵa jáne óńdeý ónerkásibin órkendetýge basa mán berip otyr. Bul rette sý resýrstaryn tıimdi paıdalaný, osy salaǵa jańa tehnologııalardy engizý jáne aýyl sharýashylyǵy jerlerin basqarýdyń zamanaýı ádisterin qoldaný úshin ózara tájirıbe almasýǵa kelistik, - dedi Memleket basshysy.

Qasym-Jomart Toqaev kelissózder barysynda aqparattyq tehnologııalardy damytý máselesine aıryqsha kóńil bólingenin aıtty.

– Qazaqstannyń bul salada jetistikteri bar. Osy rette qos tarap zaman talabyna saı ІT sheshimder qabyldaý jáne ǵylymı izdenisti tereńdetý baǵytynda birlesip jumys isteýge kelisti, - dedi Prezıdent.

Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń prezıdenti Masýd Pezeshkıandy qarsy alǵanyn jazǵan edik.