Qazaqstan-Iran qazaq jerinde ál-Farabı murasyna arnalǵan keshendi birlesip salady
ASTANA. KAZINFORM — Qazaqstan men Iran halyqaralyq uıymdar aıasyndaǵy yqpaldastyǵyn aldaǵy ýaqytta da jalǵastyra beredi. Bul týraly Aqordada Iran Islam Respýblıkasynyń Prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
— Mádenı-gýmanıtarlyq baılanys qashanda eki eldiń qarym-qatynasynyń altyn kópiri sanalǵan. Búgin buǵan taǵy da kóz jetkizip otyrmyz. Iran muraǵattarynda saqtalǵan qazaq tarıhyna qatysty birqatar kóne qoljazbanyń kóshirmesin ákelgen eken. Onda 18 ǵasyrdaǵy ult shejiresi men mádenıeti týraly qundy derekter bar, — dedi Qasym-Jomart Toqaev.
Prezıdenttiń atap ótýinshe, bul qujattar ǵalymdarymyzǵa sol kezeńdegi Qazaq handyǵynyń halyqaralyq qatynastaryn tereń zertteýge múmkindik beredi.
— Osy rette men Qazaqstannyń Mádenıet jáne aqparat mınıstrligine Irannyń tıisti mekemelerimen birlesip, elimizde kóne qoljazbalar kórmesin uıymdastyrýdy tapsyrdym. Sondaı-aq biz ıran tarabymen birlese otyryp, qazaq jerinde uly oıshyl Ábý Nasyr ál-Farabı murasyna arnalǵan tarıhı-mádenı keshen salý týraly sheshim qabyldadyq. Buǵan qosa búgin bilim jáne ǵylym salasyndaǵy yqpaldastyqty kúsheıtý joldary talqylandy. Eki eldiń medıtsına qyzmetkerleri ózara tájirıbe almasyp, biliktiligin arttyrý jáne jetistikterimizben bólisý máselelerin oılastyratyn bolady, — Prezıdent.
Memleket basshysy mártebeli meımanmen halyqaralyq máseleler jóninde de pikir almasqanyn atap ótti.
— Qarýly qaqtyǵystardyń, sanktsııalyq qysymdar men saýda soǵystarynyń ýshyǵa túsýine alańdaýshylyq bildirdik. Halyqaralyq uıymdardyń bedeli tómendep ketkenine qatysty oı bólistik. BUU rólin kúsheıtý, onyń qararlary men jarǵylaryn qatań saqtaý, halyqaralyq quqyq ústemdigin ilgeriletý jáne ádildik qaǵıdattaryna berik bolý týraly ortaq ustanymǵa keldik. Biz barlyq teketirester men janjaldardy dıplomatııalyq kelissózder arqyly beıbit jolmen sheshý qajet ekenin atap óttik. Qazaqstan men Iran halyqaralyq uıymdar aıasyndaǵy yqpaldastyǵyn aldaǵy ýaqytta da jalǵastyra beredi. Qazaqstan men Irannyń keńeıtilgen seriktestigin nyǵaıtý halyqtarymyzdyń múddesine saı keledi. Biz ózara dostyq pen baýyrlastyqqa negizdelgen baılanystardy bekemdeı beremiz. Búgingi kelissózder nátıjeli boldy deýge tolyq negiz bar. Eki eldiń dostyǵy máńgi bolsyn, — dedi Qasym-Jomart Toqaev.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik.
Keıinnen Qasym-Jomart Toqaev pen Masýd Pezeshkıan shaǵyn quramda kelissóz júrgizdi.
Sonymen qatar kelissózder qorytyndysy boıynsha Qasym-Jomart Toqaev pen Masýd Pezeshkıan Birlesken málimdeme qabyldap, 8 qujatqa qol qoıyldy.