Qazaqstan Ipotekalyq kompanııasy 2014 jyly 1 mlrd. teńge kóleminde taza tabys tabýdy josparlap otyr
«Bıyl biz 1 mlrd. teńge tabýdy kózdep otyrmyz. Onyń negizgi quramy berilgen qaryzdardyń syıaqylary bolyp otyr. Bizdiń kompanııanyń senimdiligi men turaqtylyǵyn reıtıngimiz kórsetip otyr. Uzaq merzimdi reıtıngtegi boljamymyz turaqty», - dedi A. Ibadýllaev.
Jalǵa beriletin turǵyn úı baǵdarlamasyn iske asyrý aıasynda Almaty qalasynda birinshi nysan paıdalanýǵa tapsyryldy. Baǵdarlama boıynsha jalpy alańy shamamen 155 myń sharshy m. bolatyn turǵyn úıdiń qurylys jumystary elimizdiń 8 óńirinde jalǵastyrylýda. Óńirlerdi 2020 jylǵa deıin damytý baǵdarlamasy aıasynda Kazaqstan Ipotekalyq kompanııasynyń jalpy turǵyn úı qory 1,4 mln. sharshy m. asatyn bolady, ol 29 myń otbasyn turǵyn úımen qamtamasyz etýge múmkindik týdyrady.
Memlekettik baǵdarlama talaptaryna kirmeıtin halyq sanatyn qoldaý maqsatynda QIK óziniń menshikti jalǵa beriletin turǵyn úı baǵdarlamasyn iske qosty.
«Jeke baǵdarlamalar jergilikti atqarý organdarymen birige otyryp júzege asyrylady. Astana, Almaty, Shymkent qalalarynyń aglomeratsııalarynda qarqyndy jumys júrgizilip jatyr. Aqtóbeni qosý oıda bar. «Nurly jol» baǵdarlamasynda baspana alýǵa kezekti azaıtý máselesi kóterilgen bolatyn. Osy baǵytqa basymdyq bermekpiz. Tólem qabileti tómen adamdar bar. Máselen, memlekettik qyzmetkerler. Olardyń kezegin azaıtýǵa kúsh salamyz», - dedi ol.
2014 jyldyń ishinde Qazaqstan Ipotekalyq Kompanııasymen jalpy somasy 12,5 mlrd. teńgege 1 726 ıpotekalyq qaryz boıynsha talap quqyqtary satyp alyndy. Kompanııanyń ssýdalyq qorjyny 87,3 mlrd. teńge bolatyn 24 myń qaryzdan quralyp otyr.
