Qazaqstan IPAF-ke tóraǵalyq etedi
ASTANA. KAZINFORM — Qazaqstan «Problemalyq kredıtter qory» AQ atynan International Public Asset Management Company Forum (IPAF) Azııa damý banki (ADB) qoldaýymen jumys isteıtin stress-aktıvterdi basqarý jónindegi memlekettik uıymdardyń halyqaralyq platformasynyń tóraǵalyǵyn resmı túrde qabyldady.
Sondaı-aq elimiz 2026 jyly Astanada ótetin IPAF-tyń 10-mereıtoılyq sammıtin ótkizý quqyǵyna ıe boldy.
Tóraǵalyqty tapsyrý rásimi Mońǵolııa astanasy Ulan-Batorda ótken IPAF-tyń 10-semınary aıasynda ótti. Onda mońǵol tarapy — Mongolian Asset Management Corporation (MAMCO) — tóraǵalyqty Qazaqstanǵa tabystady.
Tóraǵalyqqa ıe bolý Qazaqstannyń IPAF qyzmetine qatysýynyń zańdy jalǵasy. Buǵan deıin 9-IPAF sammıtiniń qorytyndysy boıynsha «Problemalyq kredıtter qory» AQ forýmnyń tolyqqandy múshesi mártebesin alǵan bolatyn, bul Qazaqstanǵa stress-aktıvterdi basqarý salasyndaǵy halyqaralyq kásibı kún tártibine neǵurlym belsendi qatysýǵa múmkindik berdi.
«Problemalyq kredıtter qory» AQ basqarma tóraǵasynyń orynbasary Baıǵazıev Nurjan Damırulynyń aıtýynsha, IPAF tóraǵalyǵyn qabyldaý Qazaqstan úshin mańyzdy kezeń jáne eldiń problemalyq aktıvterdi basqarý salasyndaǵy ınstıtýtsıonaldyq saraptamasynyń damýyn kórsetedi.
— Eger protokoldyq turǵydan emes, mazmundyq qyrynan qarasaq, IPAF-taǵy tóraǵalyq eń aldymen eldiń halyqaralyq kásibı dıalogqa tek qatysyp qana qoımaı, ony ári qaraı damytýǵa qabiletti deńgeıge jetkenin moıyndaý. IPAF — bul qarjy júıeleriniń turaqtylyǵy, stress-aktıvterdi basqarý tásilderi jáne júıelik táýekelderdi azaıtýdyń praktıkalyq tetikteri talqylanatyn alań. Osy turǵyda tóraǵalyq elder arasyndaǵy kásibı ózara is-qımyldy jáne tıimdi praktıkalarmen almasýdy uıymdastyrý jaýapkershiligin bildiredi, — dedi Nurjan Baıǵazıev.
IPAF Azııa elderiniń memlekettik uıymdaryn, qarjy ınstıtýttaryn jáne aktıvterdi basqarý kompanııalaryn, sondaı-aq halyqaralyq uıymdar men jumys istemeıtin kredıtterdi (NPL) retteý salasyndaǵy kásibı qaýymdastyqty biriktiredi.
Qor ókiliniń aıtýynsha, Qazaqstanda ótetin IPAF-tyń mereıtoılyq sammıti jahandyq ekonomıkalyq táýekelderdiń artýy jáne qarjy naryqtarynyń transformatsııasy jaǵdaıynda erekshe mańyzǵa ıe.
— Búginde stress-aktıvterdi basqarý taqyryby tek bank sektorynyń sheńberimen shektelmeıdi. Paıyzdyq mólsherlemelerdiń ózgerýi, ınflıatsııalyq qysym, geosaıası turaqsyzdyq jáne jahandyq ekonomıkalyq úderisterdiń transformatsııasy qarjy júıeleriniń turaqtylyǵyna tikeleı áser etedi. Osyndaı jaǵdaıda elderge praktıkalyq tájirıbe almasýǵa, zamanaýı retteý tetikterin talqylaýǵa jáne táýekelderdi basqarýdyń birlesken tásilderin ázirleýge múmkindik beretin halyqaralyq alańdardyń mańyzy arta túsedi, — dep atap ótti ol.
Sammıt aıasynda aktıvterdi basqarý protsesterin tsıfrlandyrý, elektrondyq saýda alańdaryn damytý, zamanaýı tehnologııalyq sheshimderdi engizý, sondaı-aq stress-aktıvter salasyndaǵy halyqaralyq ınvestıtsııalyq yntymaqtastyqty keńeıtý máselelerine erekshe nazar aýdarý josparlanyp otyr. Іs-sharalarǵa shamamen 14 eldiń memlekettik jáne qarjy ınstıtýttarynyń, halyqaralyq uıymdardyń, ortalyq bankterdiń, aktıvterdi basqarý kompanııalarynyń jáne qarjy naryǵynyń kásibı qatysýshylarynyń ókilderi qatysady dep kútilýde.
«Problemalyq kredıtter qory» málimetinshe, sammıt baǵdarlamasyna IPAF-tyń Jyl saıynǵy sammıtin, jumys istemeıtin kredıtterdi (NPL) retteýge ınstıtýtsıonaldyq daıyndyq máselelerine arnalǵan Halyqaralyq konferentsııany, Investıtsııalyq forýmdy jáne IPAF Koordınatsııalyq keńesiniń otyrysyn ótkizý kiredi.
